حياتي اليوم صحيفة إلكترونية يومية
لأسباب خفية ..تعيش طبقة معينة من الناس تحت رحمة الآخرين وكلامهم.. ولما أى حد منهم بياخد قرار بيبقى دايما فى ذهنه كلام الناس ووضعه بالنسبة للناس، ومقارنة حاله بناس تانية حتى لو بيعمل حاجة غلط بيبقى اهم حاجة انه يخبيها عن الناس ويبرر عمله لنفسه بالآية الكريمة: (اذا بليتم فاستتروا ) .
حياتهم بالكامل خير مثال لهذا..واحسبها معايا فى الجواز مثلا كل مراسم الزواج من شبكة وشقة وفرح عشان الناس …والموت من عزاء ودار مناسبات وكل المراسم دى عشان الناس .. حتى التعليم اصبح من الحاجات اللي بيهتموا فيها باسم المدرسة واسم الكلية عشان السباق الوهمى اللى عاملينه مع الاقارب والجيران …
حتى التدين بقت الناس طرف فيه.. لو انت بنت لازم تكونى بحجابك اللى ممكن تقلعيه بس برة المنطقة ومش قدام اهلك ومعارفهم عشان الناس…ولو كنت ولد ممكن ماتصليش خالص بس صلى الجمعة عشان الناس.. مش عارفة امته هنغير اولويتنا ونعمل الى يبسطنا وطظ فى الناس.
مبقتش فاهمة الناس دي بقت كده إزاي..وليه مش بيفكروا في راحتهم النفسية.. وينسوا كل الناس اللي شاغلين نفسهم بيهم ليل نهار..لازم يفهموا ان الحياة فى الاحاسيس, فى التفاصيل اللى تريح النفس !
نصيحة..اوصل بين واقعك وخيالك اللى نفسك تعيشه..خلى مبدأك دايما انك تتعامل زى اى انسان طبيعى..بيحب ويكره.. يصيب ويغلط , دوس على الناس وكلامهم وكمل عادى وخليك مقتنع بنفسك وتفاصيلك.. وحط 100 خط تحت قلبك وعقلك لانه ميصحش تسجنهم لصالح الناس وكلامهم.
والأهم من كده.. اعمل كل اللي بتحبه طالما اللى بتحبه ده مش غلط ولا حرام.. خلي تدينك لله مش للناس..وخلي حياتك وقراراتك لك ولأهلك مش للناس..متفكرش هيقولوا ايه عليك..عيش حياتك بتوازن واعمل اللي انت شايفه صح..لأنك طول ما انت بتعمل ده هتلاقى نفسك.. ومحدش في الزمان ده محتاج اكتر من انه يلاقى نفسه!
