حياتي اليوم صحيفة إلكترونية يومية
جمله أول ما سمعتها للمره الأولي أدهشتني، وأعتقدت إنها كومكس خفيف من الكومكسات الموجوده علي الفيس، لكن الكومكس المرة دى كان من سيادة الريس وهو بيطالب كل فرد فى مصر التبرع ولو بجنيه!
طبعا مش غلط إننا نقف جنب بلدنا ودا حقها علي كل مصرى، ولا حرام إن كل واحد فينا يبدأ فعلا بالجنيه، بس المفروض الحكومة يكون عندها سياسة واضحة وصريحة أمام كل طوائف الشعب، دا إحنا في مركب واحدة ولا المركب دي ما بيركبهاش غير الغلبان اللي دايما بتغرق بيه؟
والحقيقة كمان ان الجنيه دا ممكن يساهم فى فطار عيلة فقيرة ، وممكن يكون عشا طفل فقير قبل ما ينام، وممكن يكون ثمن 20 رغيف عيش، لكن معتقدش إنه هيفرق مع رجل أعمال ولا قاضي ولا موظف كبير وساعتها تعالى نبدأ أول خطوه في عجلة التنمية الإقتصادية وفي بناء بلدي !
زمان لما كنت بدرس في كتاب التاريخ في المدرسة علمونا إن لما التتار قرروا يدخلوا مصر وكانوا علي أبواب بلدنا.. ساعتها قطز ملقاش في خزينة الدولة ولا دينار واحد.. ومكنش عارف يمول الجيش إزاي.. فكر ساعتها إنه يفرض ضرايب علي الشعب.. وجمع علماء الدين عشان يسألهم.. وكانت الأغلبية منهم موافقين علي قراره لخوفهم منه وفي نفس الوقت خايفين من رد فعل الناس..
ساعتها وقف الشيخ العز بن عبد السلام وطلب منه إنه قبل ما يفرض ضرايب علي الفقراء إنه يصادر أموال الأمراء والأعيان حتي يكونوا في مستوي معيشة عامة الشعب.. وبعدين نفرض ضرايب علي الشعب..وفعلا قطز ساعتها أمر بمصادره أموال الأمراء والأعيان.. والشعب أول ما سمع إنه قام بهذا الفعل كلهم قرروا إنهم يتبرعوا لتمويل الجيش تطوعا.. بدون فرض أي ضرايب علي الشعب..
احنا أكيد عارفين ان الريس هدفه مصلحة مصر، ومعندناش مانع نصبح على مصر بكل اللي هي تتمناه..لكن لازم كمان نحس ان الناس اللي مستفيدة من خير البلد دي هم كمان بيقفوا مع بلدهم..ومش بيتاجروا بيها ..ولا بيتهربوا من الضرايب.. ولا بيحولوا دولاراتهم لبنوك سويسرا ويسبوا بلدهم تغرق!
وصباح الفل عليكي يا مصر
