الشاعرة أمل فرج تكتب: إعلان وفاة… !

هدهد تنهد فالسما اصله اتظلم
صرخ الانين لما تعب كتر السكات
صار معجزة
خلى الخيول متلجمة
خايفة السحاب حتى المطر
يهطل دموع اصبح سيول
كتبت بايدها الملحمة وكان السؤال؟
ازاى عذاب الشكوى ساعة المظلمه
جوة الكتاب بعد اكتئاب
ممكن تثور براكين نفاق
بعد اما كان الاتفاق
انه خلاص هيموت صغير
شاء القدر
انه بصوته النونو ده يسير معجزات
تنحت فصخر وبان لهم انه ضعيف
لكن يشاء رب العباد
وبحكمته يخرس رياح متجسمة
فصورة بشر
وبظلمهم الدنيا كات فالمنحدر
هدهد خلاص كان ينحضر
بعد الجروح
عاشها حلاوة روح تروح
قالبة الزمن
يرجع شباب
بعد اما شاف الدنيا غاب
و القلب شاب
وضماير الناس العجاب
متسجلة دايما غياب
ازاى بصوته النونو ده
كان طوق نجاة
لكتير وياما اتعذبوا جوة الحياة
ازاى قدر يدخل جحور
تعابين بتحدف سمها فليلها العقيم
ازاى قتل مكر اللئيم
ازاى دفن تماسيح بتنهش فالقمر
وسلاحه كان تسابيح وذكر
ونية صافية انه اكيد راح ينتصر
فالملحمة سطرين عليهم خط احمر.. (انتباه)
ده كله حلم
الهدهد اللى حكاه..
فى ساعة احتضار
تفسيره كان عجل بموتك والنبى
علشان محال فالدنيا هتحس الامان
حلمك ده كان جواك امل
واليأس غالب ده عشان قلبك دمل
جواك سواد غدر البشر
لما فهم بايديه كتب
فوق الضريح
اعلان وفاة