حياتي اليوم صحيفة إلكترونية يومية
نفسي اكتبِك بحروف جديدة ..
ما خطهاش يوم القلم
ولا حد عبر عنها بشتى الصور
نفسي ارسمِك أحلام بتتحقق ..
يوماتي ويا طلعة شمس ..
وظهور للقمر
نفسي ابتكر
قالوا كتير في وصف كل الأمهات
لكن انتِ عندي غير حكايات البشر
لا هاقول حملتيني في جوفِك ..
واتصل قلبي بقلبِك طول شهور
ولا اقول طلقتِ يوم ولادتي ..
بضعف حاضن قوتِك ..
معجون سرور
ولا اقول رضعت حليب ونور
ولا اقول تعبتِ
أو سهرتِ
او فرحتِ
أو صبرتِ لحد عودي ما قام فتِي
ولا حتى رقص القلب شايف زفتي
ولا حتى إنك تحت رجلك جنتي
ولا دعوتك حفٌاني مطرح ما اتنقل
ولا عمر راح لاجل اما تكمل سكتي
كل الكلام ده اتقال وحافظينه ..
ف كتب
كل الكلام ده اتشاف في شكل هدية .. ملفوفة ف علب
كل الكلام ده غناوي سامعينها خصوصا ..
لما ييجي شهر مارس ..
يرمي بجريده الرطب
فضلِك ووصفِك لسه محتاج للقاموس ..
المفتقَد
علشان اعد الحلو فيكِ يا كوكبي ؟!
محتاج عدد بعد العدد بعد العدد
محتاج مدد
محتاج أصور لك خلايا الروح ..
بتتهجد حنين
محتاج عينين ..
ترصد خزاين رحمتك
صوت لمستك تحت الإيدين
عاجز يا أمي وعشمي إنك تلهميني ..
من عطاياك الكلام
غششيني كلمة وحدة أعدي بيها الإمتحان
او هاتيلي صورة ليك ..
أحطها ف ورقة إجابتي ..
تغني عن كل الكلام
فانجح قوام
