حياتي اليوم صحيفة إلكترونية يومية
—
مركب
وشمس
وبحر
وشريط قطر
ودموع في عين بتضحك أنين
من كترها ملِت البحر الحزين
والبحر غدار مليان دموع
غرقان فيها غياب حنين
***
والمركب ماشي ماشي
مش عارف طريقه فين
شراعه مقطوع
عليه صورة حبيب غاب من يومين
بس أهو ماشي مهموم وحزين
***
والشمس طالعة من بعيد
نسيت مكان شروقها منين
وفي شريط قطر
بس فين القطر؟!
ورايح فين وجاي منين؟!
وعيون لسه بتبكي
والبحر فاض من الدموع ومن الأنين
والمركب مش هيتحمل سنين
والشمس راح تغرب في حين
وشريط القطر
مهجور ومش عارف هيمشي عليه إيه
وامتى
وفين!
وبغيب وأتوه بين دنيتين
دنيا محتومة
ودنيا مليانة حب وحنين
وهناك كده
في بيت بعيد
وآه محكومة في الإيد
وعِند بيجري في وريد
وحب مدفون ووحيد
وهَجر بيوجع
وفرح بعيد
بس بحاول
مركب وشمس
وبحر
وشريط قطر
* شاعرة مصرية.
