حياتي اليوم صحيفة إلكترونية يومية
ما قدرتش تهزني
ولا حتى تلمس عِزتي
ولا مرة حلمك الرخيص طاول قامتي
ولا مرة وهمك الكبير خدني لحظة
أنا اللي شُفتك واهي قدامي
بتتاجر بكل حاجة
بالكرامة
بالنفوس
وبالأماكن
وبالوجوه اللي باعت ضمايرها
واتصورت إن الكرسي يديك هيبة
وإن النفوذ يحميك من انكسار
بس أنا اللي كسرتك
وأنا اللي جرّعتك مر الحقيقة
وأنا اللي خلتك تشوف في المراية
نُصك الملوث
ونصك الجبان
ونصك اللي مش قادر يواجه نفسه
ظنيت إنك تقدر عليا
زي ما قدرت عالضعاف
لكن أنا ما كنتش واحدة من اللي يخافوا
أنا اللي دُست على غرورك
وأنا اللي حطيتك في مقامك الحقيقي
ولا كلمة منك هزتني
ولا غيابك كسرني
ولا وجودك زادني
أنا بنت أصول
اتربيت بقرش نضيف
ما تمدتش إيدي ولا سرقت
ولا نهبت ولا غدرت
ولا استغليت مكان
ولا دنست اسم
ولا خنت عِشرة
ما قدرتش تكسرني
ولا تهز راسي
ولا تدوس على كرامتي
أنا اللي كسرت جواك الكبرياء
وسرقت منك آخر نقطة احترام
أنت دلوقتي ما تقدرش تبصلي
نظرة ما تعجبنيش
ولا ترفع صوتك عليا
ولا تحلم إنك يوم تلاقيني ضعيفة
أنا اللي كتبت النهاية
وأنا اللي قلت الكلمة الأخيرة
وأنا اللي علمتك
إن ما فيش نفوذ يشتري الكرامة
ولا في سلطة تكسر الحرية
أنا ما قدرتش تكسرني
وأنا اللي كسرتك
قدام نفسك
وقدام الدنيا
وما بيننا ما عادش غير صمت
صمت أكبر من كل أكاذيبك
وأعظم من كل أوهامك
ما قدرتش تهزني…
وأنا اللي قهرتك
وفي النهاية بقولها وبعلو صوتي أقررها
أنا ما قدرتش تكسرني…
أنا اللي كسرتك قدام نفسك وقدام دنياك
والكرسي اللي سندك عمره ما هيسند روحك المكسورة.
