حياتي اليوم صحيفة إلكترونية يومية
يا عم يا بياع..
ملاقيش حاجة قديمة للبيع؟
رد وقالي: القديم خلاص راح..
وماجاش بعده غير وجع وجراح
قلتله: عاوزة الناس القديمة
بأخلاق زمان..
بقلب أبيض.. بروح هنية
ضحك وقال: دي ما تلاقيهاش
غير تحت التراب.. دي حكاية منسية
اللي عندي جزم قديمة من غير رباط
وحلل مكسّرة.. الغطا بتاعها ساب
وشنطة مشقوقة.. ما فيهاش غير تراب
وباب مسوّس.. عايش ع العتاب
قلتله: يا بياع
دا مش للبيع.. دا للمهملات
قال: هو ده زمانا..
يرمي الغالي.. ويشيل الكسرات
يا بنتي.. الزمن الحلو اندفن
واللمة راحت.. والضحكة اختفت
والقعدة بقت مصالح.. والرزق اختلط باللعنات
والرحمة فضلت اسم.. مكتوب ع السموات
دلوقتي الغلا مالي البيوت
والغل مالي القلوب
والحقد ساب وشوش العيال
وبقى في الضحكة عتاب وسكوت
آه يا بياع.. أنا مش عاوزة جزم ولا حلل
أنا عاوزة قلب زمان.. اللي ما يعرف زلل
عاوزة الجدع.. اللي كان يحطك قبل نفسه
عاوزة الصحبة اللي كانت بالدنيا كلها
مش بفلوس.. ولا بمصلحة.. ولا بمقابل
قال: يا بنتي ما تدوريش..
اللي بتسألي عليه خلاص مابقاش يعيش
القلوب اتبدلت.. والجدع بقى مصلحجي
والقيمة بقت في الجيب.. مش في الضمير ولا في العِشْرة ولا في الود الصحيح
ضحك وقال: روحي يا بنتي
القديم خلاص مات..
مبقاش يتشال ولا يتباع
اللي فاضل.. صورة باهتة
في قلوب غلابة.. لسه بيدعوا لربهم بالستر والرضا
واللي باقي.. كلمة على لسان الناس:
“الله يرحم زمان الطيبين”
————————————-
✍️ وجع مكتوب بحبر الحنين..
