حياتي اليوم صحيفة إلكترونية يومية
في الأول من شهر أبريل الحالي.. وفي واحدة من كبري الصحف المصرية خرج علينا »أحمد أبريل» المتحدث باسم الوكالة المصرية للفضاء يبشرنا بأن مصر تستعد لغزو المريخ بحلول عام 2050 !!
وفي ذات الخبر أكد »محمد كيدبات» المتحدث باسم بعثة المريخ الأولي أن مصر ستبني مدينة سكنية في المريخ لتستوعب الزيادة السكانية الكبيرة للشعب المصري!!
وكان من محاسن الصدف أن الخبر جاء علي لساني السيد كيدبات وأبريل.. واحنا في بداية شهر أبريل !!
ﻷن الكلام ده لو بجد يبقي مين اللي بيفكر فيه و ليه!!
ويا تري كيف ستكون بصمات وتبعات غزو المصريين للمريخ؟ هل سننقل لهم أكواما من زبالتنا اللي مالية شوارعنا والتي ننفرد بها عن شعوب العالم.. أم سنغزو المريخ علشان نلوث أنهاره وبحاره زي ما بنعمل في مصر !! ونزيح عليهم مياه الصرف البشرية والصناعية!!
ويمكن ها نغزو المريخ علشان نملاه زوايا بميكرفونات ومكبرات صوت ونعمل أفراح ومياتم تزعج سكان المجرات المجاوره !! أو ها نغزو المريخ بميكروباصاتنا وتكاتكتنا وسلوكياتنا الهباب في السواقة ..
أنا في الحقيقة مش شايفة إن غزونا نحن المصريين لكوكب المريخ سيمثل أي إضافة للكوكب !! وكل اللي ها نعمله إننا ها نحوله لنسخة من أحيائنا العشوائية ويبقي فيه فيصل المريخ.. وامبابة المريخ .. وباب الشعرية المريخ !
ونبني سجن طره المريخ.. وعقرب المريخ وما ننساش.. يبقي عندنا محافظة المنوفية المريخية لزوم ما تخرج لنا حكام مصر بنسخة المريخ!
وسنة 2100 بقي هانبقي عاوزين نبني العاصمة المريخية الجديدة بعد ما نكون بوظنا الدنيا. وسلملي علي كيدبات أبريل!
———
daliagamal2020@yahoo.com
