حياتي اليوم صحيفة إلكترونية يومية
بيقولوا… خليك متفائلة
واعتبرِي الدنيا رواية طويلة
بس الرواية فصولها حزينة
والضحكة فيها بقت مستحيلة
يقولوا… عيشي حياتك لنفسك
طب والنفوس اللي حواليا ليه؟
أنا لو قفلت عيوني عن غيري
يبقى فقدت إحساسي فيا أنا فيه
النجم العالي كان بيهدي
دلوقتي مطفي… ملوش مداد
والطريق المرسوم بالأمل
انداس برجول… واترمى رماد
الرحم اتقطع زي خيط قديم
اتخنق جواه صوت الونس
والجار بقى سور بلا باب
كأن العمر اتبنى على خرس
القلب الطيب… بقى غريب
زي غنوة حائرة من غير وتر
والأمان بقى حلم يتباع
في سوق صاخب جوه صور
بيقولوا… حبّي نفسك الأول
طب نفسي دي من غير الناس خراب
أنا مراية مش هتعكس فرحة
لو حواليا ما فيش عتاب
أعمل إيه؟ وأنا شايفة الحنية
بقت ضيف نادر في ليالي السمر
والوجع يكتب نفسه على الجبين
زي قدر محتوم… لا بيمر
تفاؤل إيه؟ وأنا ف حضن الليل
بلاقي دموعي وسادة وباب
وبقول لنفسي… الدنيا قاسية
والأمل فيها محتاج معجزة رب الأرباب
ولو للحزن جناح يطير
كان ساب قلبي وسكن الغياب
لكن لسه واقفة رغم الكسور
وأنا اللي بوجعي… أقوى جواب
