حياتي اليوم صحيفة إلكترونية يومية
—
من عشرين سنة فاتوا
كان عمري عشر سنين
وكمان عشرين تاني ييجوا
راح أبقى في الخمسين
دلوقتي أصلي خلاص
عمري بقى تلاتين
بلعب في نص سنين
وفي نُص كام حاجة
عمري اللي فات حاجة
والجاي كمان حاجة
عمري اللي فات
كان نور
كله أمل بيدور
وكنت بتمنى
أعيش وأتهنى
وكنت برسم حلم
وحبيب جميل بيضُم
وكنت بجري وأعيش
مبخافش من حاجة
كان عندي أب وأم
وإخوات بنفس الاسم
مسنودة أنا بيهم
وبخاف أنا عليهم
فجأة لقيتني بعيش
مع ناس متفهمنيش
ولا عاوزة ولا حاجة
أنا حلمي مات فيا
وأيام معدية
وآهات وناس بتفوت
وأعز ناس بتموت
وواجعني كام حاجة
وبقيت في همي ببات
وأنا شايلة هم حاجات
مبقيتش أعيش سني
ولا عارفة أنا أغنِّي
ولا عارفة أجري وأعيش
وخلاص ميلزمنيش
ولا عاوزة ولا حاجة
وأنا كنت وأنا عشرين
بحلم أنا بفارس
يخطفني بحصانه
وأعشق كده جنانه
ونطير سوا عاشقين
وندوب مع الدايبين
وألبِس له الأبيض
ونعيش حياة سكر
ونجيب بنات وبنين
وأحب أصحابي
ولا حد يخدعني
ولا عيشة توجعني
وفضِلت عايشة الوهم
ولحد ما اتحقق!
وفي يوم لبست أبيض
ولا كنت أعرف إيه
الدنيا خبت إيه
أتاريها وجعتني
وبسرعة تعبتني
وبسرعة جه التلاتين
ويا خوفي من بكرة
في إيه بقى هيجرَى
معرفش لسه في إيه
مخبياه السنين..
وأنا عمري بقى تلاتين
