حياتي اليوم صحيفة إلكترونية يومية
بقلم/ شاهندا البحراوى
أول صفحة هتكلم عنها النهارده من دفتر أحوال المرأة أو بمعنى أدق أرشيفها الخاص.. هى ذاكرة المرأة… والمعروف ان الذاكرة العاطفية عند المرأة أقوى من الراجل بالدليل ان ممكن يحصل خلاف او صدام بين الراجل والمرأة بنكتشف هنا ان الراجل مع مرور الوقت بينسى لكن الست بتأرشف..
نيجى نفسر العلاقة دى بشكل اعمق شوية فكرة اننا بنبنى علاقة حب وشراكة بين راجل وست وتكون علاقة مكتملة الأركان محتاجة مجهود وأساسيات وتضحيات فلأزم هنا نقف شوية.
ونحدد القاعدة العامة أن محدش فينا كامل وانك لما تحب تدخل علاقة ميكنش هدفك الأساسى انك تدور على الشخص المناسب الأهم انك تكون انت الشخص المناسب لنجاح العلاقة دى الست هنا لما بتحب مش بتستنى المقابل من الطرف التانى اد ما بتدور على التقدير والاحترام والوضوح ودى النقطة الأهم اللى اغلب الرجالة مبتعرفش تتعامل معها لأن البعض منهم بيعتبر انه طالما اعتذر وقدم الهدايا يبقى كدا نقطة الخلاف تلاشت..
والبعض الأخر بيجيد فن الهروب يا أما الصمت العقابى أو التجاهل او تغير الموضوع وفى منهم اللى بيجيد الطريقتين ولما الست بتوصل لمرحلة انها تنهى الخلاف لاى سبب بيعتقد ساعتها الراجل ان الخلاف انتهى.. هو انتهى بالنسبة له لكن بالنسبة لها اتأرشف.. وموقف على موقف بتوصل لطريق مسدود.. ومننساش ان الجبل هو شوية حصى صغير.. بس كتير انا بشوف وبسمع ستات سنها عدى الستين سنة واكتر.. وفاكرة موقف لزوجها من بداية زواجهم بكل تفاصيله.
اللى عايزة اوضحه هنا للرجالة.. فى النهاية انك لما تحب ست.. ومتأكد من حبها ليك.. بلاش توصلها لمرحلة الأرشيف.. خليها تصفى اللى جواها.. دا اول بأول حتى لو دا هياخد منك مجهود.. بس صدقنى هيفرق كتير فى شكل علاقتكم بعدين.. وبلاش تفضل مصدق ان رصيدك ثابت عشان فى الآخر هتنبهر.
