حياتي اليوم صحيفة إلكترونية يومية
الأمومة مش بطن كبرت ولا سالوبتات بينك وچينز على كوتشى أد كفك وتيشرت عليها باتمان ولا عربية فيها بيبى طول الليل سهران !
الأمومة مش حنسمى ايه ولا شعره طلع لونه ايه ولا حلوة زي مامتها !
الأمومة خلف الكواليس غير اللى بنشوفها في عزومة على غدا في تشيليز ولا سهرة في فرح بفستان سواريه ..
الأمومة مش زى ما بتشوفها في كارفور ولا زيزينيا مول ..
الأمومة خلف الكواليس في منبة بيرن الساعة ٦ وعين مش بتغفل قبل الساعة ٢
الأمومة في طبق رز عليه بامية وطبق سلطة لو مكلتوش مَش حتاخد مصروف!
الأمومة في إيد عالكلاكس بتوسع عشان تلحق التمرين وتدهن بليل في الكريم عشان شد العضل متين ..
الأمومة بتتدفى في حضن ولادها في عز البرد و تحط بإيدها كمادات ساقعة للعيانين !
الأمومة كيكة بتبوظ فتجرب تانى وتالت طريقة مين ولا مين
الأمومة بتبكى ساعات بليل و تصحى جواها أمل كبير !
الأمومة ورق و مذاكرة كتير وورشة تلوين
الأمومة حاجات كتير حب و احتواء و حب الغير ..
الأمومة حضن كبير
الأمومة احتواء للصغير و الكبير في أمهات كتير مخلفوش بس احتووا و كانوا كتف و دهر و سند و أمان
الأمومة احتواء… احتوائك لصديقة في عز ضيقتها أمومة
حنيتك على زوجك وخوفك عليه أمومة
احتواء أختك ليكى أمومة
القطة اللى بتربيها أمومة 🌸
ده انا ساعات بحس في حضن بنتى ليا إنها أمى💕
ويكفي أن نطمئن بأن “الجنة تحت اقدام الأمهات”❤️
