حياتي اليوم صحيفة إلكترونية يومية
تفتكروا ايه الحاجة اللي ممكن تخلي الواحد ياخد قرار النسيان او انه عمره ما يرجع زي زمان ؟
طب ايه الحاجة اللي ممكن تخلي الواحد مش عارف ينام ؟
ازاي إنسان ياخد خطوة في طريق النجاح ؟ ازاي يعرف إذا مش مرتاح ؟
السر كله في الألوان..
الحب بيملا روح الإنسان والحزن بيسحب كل الالوان فرحة وضحكة أي طفل بتبقى rainbo في المكان كلمة بحبك لوحدها بالتة ألوان،
اسأل عن الأبيض دكاترة السنان نقطة سودة تدمر أسنان،
وإسأل عن الاسود اللي لسه فاقد إنسان ،
اسأل كمان عن الأبيض العروسة اللي بتحضر لفرحها الفستان ،
وعن الاسود العريس اللي لبس البدلة ورش البرفان،
اسأل عن الأحمر دكتور جراح والحبيب اللي حبيبه راح !
واسأل عن الأزرق الصياد حيقولك رزق وبراح،
ومن غير ما تسأل الجنايني عن الخضار حتحسه ود وعمار ومش ححكي عن شمس جوانا ومعكوسة فوق في السما ولا عن سحاب بياضه مالي قلوب الطيبين..
كل واحد فينا عارف هو مين ولو جاب ورقة وقلم وكتب كلمتين حيعرف جى منين ورايح فين؟
اللي بينسى حد بيرجعله علبة ألوانه بيخبي جوه كل لون ذكرى ومكان ويقفل العلبة لما يقرر النسيان،
اللي بيقرر يمشي مش لاقي الأمان على حسب شايفُه أيه في الالوان ،
واللي مش مرتاح يغير البالته،
الدنيا ألف لون ولون والله سبحانه خالق الفن والألوان
ذكره ود وأمان ….
ناجيه في نهارك وليلك وأول ما تصحى وقبل ما تنام 💗
