حياتي اليوم صحيفة إلكترونية يومية
(ياريت القلب كان يوم صَلْب ! )
سامحينا،
==مسامحاكم
إيه يعني..! حاجة بسيطة،
دا حِتَّة كسر جُوّه الروح،
وكام يوم أكيد هيروح،
وياما القلب كان شايل،
ودافن جُوّه بحر جروح…..
دا حِتّة كسر جُوّه الروح!!
وإيه يعني حاجة بسيطة!
دا كام جرح من جُوّهْ،
وشرْخ وهَدَّة في القُوَّة
ودمعة، وذكرى كام ضحكة،
واهي تصحِّي الحنين في الروح……
يشعلل تاني جُوّه القلب،
(ياريت القلب كان يوم صَلْب،)
لابيْهِمُّه بعاد ولاقرب،
تمر اللحظة ينساها،
ويطوي الحزن جُوّاها،
وينسى الضحكه هِىّ كمان،
ويتْبدِّل حجر صوان،
ولاعاشق ولاهيمان،
ولا كارِه ولا حابِبْ،
ولا حَزْنان ولافرحان…..
(ياريت القلب كان يوم صلب، )
لاحاسس باللّي باقي معاه،
ولا باللّي بَخَل بِدَوَاهْ،
ولا باللّي شَدّ القُوس،
رَمَى السهم رَشَقْ جُوّاهْ……
(ياريت القلب كان من صخْر،،)
لايِعْرَف لِين ولا تهاون،
ولا يعشق عبير الزهر،
يضخ الدم في سكوت،
ولا فارق حياة من موت،
ولايْحِس بحنين ولا شوق،
ولو غابوا مليون دهر…..
(ياريت القلب كان من صخر..!)
سامحتينا؟ مسامحاكم،
سامحت الكل ويّاكم،
كفاكم باللي جُوّاكم،
أصعب من مرار الصبر…
آهو بياكل في أرواحكم،
وكان الله في أعوانكم،
وهدعيلكم في سِر وجهْر.
