كبسولات مهدئة…(فيروس الحب)…تكتبها رشا صيرة

أوقات بنقابل ناس بنحبهم وبنستغرب نفسنا إزاى حبناهم بالسرعة دى وبنسأل إزاى ده حصل !
قلوبنا ساعات لما بتتعب ويقل أحساسها بالحب بتقل مناعتها وبتضعف وتتألم وتعانى !
إحساسها بشئ جديد عليها مش بتقدر تقاومه وبتحاول ترفضه !
بس فى الآخر بتستسلم ليه بمنتهى السهولة كأنه فيروس حب أصاب القلب !
مش كلنا بنبان أقويا أو اللى جوانا زى اللى على وشنا !
فى ناس مظلومة من ضحكتها وهى من جواها خربانة !
حامل الفيروس أول ما بيشوف وبيحس بكده بيجرى عليها ويعديها !
وطبعاً علشان مناعتك ضعيفة أوتعبان من جوه هتلقط الفيروس بسرعة !
بس ده فيروس مفيد …مش مؤذى!
لأنه دخل جواك علشان يعالجك ويخرجك من ضعفك ويقوى مناعتك بالحب ،
وهتقدر تتنفس تانى بكل راحة وبرغبة صادقة فى استقبال أى شئ فى حياتك
وهتعرف إن أغلى الأشياء وأهمها ممكن تجيلك من أكتر حاجة كنت بترفضها !