الثلاثاء , 23 يوليو 2024

“فات العمر”…قصيدة بقلم د. شيماء مكي

= 1311

وفات العمر زي الريح
لقيتني كبرت على سهوة
لقيتني عشقت شرب الشاي
بقيت مدمن كمان قهوة
لقيتني بقيت بحب الصيف
و اخاف من النسمة لاستهوى

لقيت الشيب صبغ شعري
لقيت كتفي بقى يطقطق
و بشكي من وجع ضهري
بقيت ساكت و مش بنطق
و مني خلاص نفد صبري
و خلقي ضاق بقيت بطهق

عرفت اني كبرت خلاص
لما مفضليش و لا جد
بقيت نكدي اوي و حساس
على وشي يبان الجد
لقيتني كمان زهدت الناس
مبقتش احب اعاتب حد

كبرت بقيت شبه جدي
بقيت ما اضحكش ع النكتة
بقيت بفضل كتير وحدي
و ايامي بقت باهتة
و ولى العمر و الدنيا
حواليا بقت ساكتة

انا عمري مهوش ستين
و لا خمسين و لا عشرة
و العمر مبحسبوش بسنين
انا بحسبها بالخبرة
بكام جرح و كام فرح
و كام واحد خان العشرة

شاهد أيضاً

ضحى أحمد الباسوسي تكتب: صوت غير مسموع!

عدد المشاهدات = 708 كانت تجلس في زاوية الغرفة، حيث الأشباح تتراقص حولها في صمت، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.