ياللى شالك فوق ودانك .. من سنين
انت مين؟ انت فين؟
انت شرقي؟ ولا غربي؟ ولا بين الجبهتين؟
انت عايش هم أهلك؟
ولا عايش جوه نفسك؟ فوق لنفسك ..
الصهاينة فهموا طبعك .. درسوا كل حاجة عنك
عرفوا امتى يخافوا منك .. وامتى منك ما يخافوش
لما بات همك وفرحك .. لما بات رضاك وغضبك
زى بعض ما يفرقوش .. اللى يفرق الرتوش
مرة ظاهرة ومرة باهتة .. مرة فاقعة ومرة مايعة
جوه بروازك وصورتك .. ليه سجين؟
انت مين؟ انت فين؟
انت شرقى؟ ولا غربي؟ ولا بين الجبهتين؟
جوه منك .. شعب أعزل
بات يكافح .. بالحجارة … وبالتراب
وانت فوق النفط عايم .. وف أيديك دفتر حساب
تحسب الخارج بكام .. وانهارده الدخل كام
لفوا فى رقبتك لجام .. لجل يحمولك مصالحك
اللى يدفع … يبقى صاحبك
واللى يحتاج لك .. عدوك .. لو أخوك
علموك .. المؤامرة ع الشعوب
علموك .. ازاى تدوب كل يوم فيك الرسالة
علموك .. حق الندالة
دفعوك .. تمن النسور المجروحين
قبضوك .. تمن القضية .. كلمتين
بيعوك الميتين … سلسلوك جوه نفسك
فوق لنفسك
كل يوم بيعدى فصل .. من فصول المسرحية
والنهاية المأساوية .. هى هى
وانت فى إيديك القضية .. بس خايف
خوف بيخرس .. كل حاسة من حواسك
خوف بيملى عليك .. كلامك
والكلام … ماهوش كلامنا .. وانت منا
واحنا منك .. غصب عنا
ياما حذرناك وقولنا .. مد جسر متين ما بيننا
سلح القوة اللى حق . . هتحمى ضهرك
راعى أهلك … عود لربك
قبل ما تولع بحورك .. والملايكة يطفوا نورك
وبغرورك .. ننجرف ويا الطوفان
والسفينة … يركبوها .. اليهود والامريكان
ياللى ما بين البنين ..
انت مين؟ انت فين؟
انت شرقي؟ ولا غربي؟ ولا بين الجبهتين؟
انت عايش هم أهلك؟ ولا عايش جوه نفسك؟
فوق لنفسك .. فوق لنفسك .. فوق لنفسك