حياتي اليوم صحيفة إلكترونية يومية
يكتبه/ عبد الناصر عبد العزيز
فى موقف القاهرة الرئيسى (موقف السلام) عربية خشب طولها حوالى 3 متر وعرضها متر ونص عليها من خيرات الله كل أنواع الأكل فول طعمية بطاطس سلطة فلفل بتنجان بصل جرجير عيش وكله جنب بعضه ويلتف حول العربية مجموعة من شباب الصعايدة بالجلباب البلدى والعمامة ينادون بأعلى صوت قرب يا باشا افطر ياباشا تعالى تعالى قرب اتفضل….
وطبعا النظام انك تخدم نفسك بنفسك تاخد الرغيف وتحط فيه اللى تحبه بأى كمية وتاكل براحتك بدل الرغيف عشرة والمية تلج فى كبايه الومنيوم من بتوع زمان ولما تخلص تروح لأى واحد من الرجالة وتحاسبة خدت رغيف اتنين تلاته انت وضميرك وهو واثق فيك وعمره ما بيراجعك حتى لوشافك وانت واخد عشر ارغفه وقلتله رغيفين عاااادى بيقولك بالهنا والشفا وشرفت…..
وبانتظام بيملوا الأطباق الفاضية واحد يقلي طعمية والتانى بطاطس والتالت عيش وهكذا…. ايه دول ومين دول ومن اى كوكب الشباب ده وايه روعتهم دى ونظافتهم ونظامهم وتسامحهم وكرمهم بصراحة صورة رائعة جميلة جدا تفكرك بزمان وطيبة زمان وكرم زمان وانت تقف فى مكان صاخب يمثل قبح الحاضر وصخب الحاضر ووحشته!
