حياتي اليوم صحيفة إلكترونية يومية
هووووس
اسمعوا منى الحكاية
كنت قاعدة هناك فــ حالى
بكتب اللى يدورفى بالى
مرة ألوش مرة احبش
بس بكتب وبجراءة
مش بدش كلام يعدى
بادى ميت مليون امارة
مرة اصرخ باستماتة
وابقى ع الرملة المحارة
مرة اكتب للشهادة
كل ظالم ليه ابادة
مرة قلمى يقولى بس
مرة احب فيه لشوشتى
مرة العن تانى عيشتى
مرة اقول تحياالفلوس
مرة اتفرمل وادوس
مرة اعمل بنت باشا
مرة اقول حرام وحاشا
مرة اتمرد وبس
والعن اللى لاوى بوزه
واكره اللى ليه فلوسه
للغلابة مرة شوف
على الرقاب يمشى بنفوذه
ده احناف الدنيا ضيوف
ليا حرف ماله خوف
واللى خاف كان كاتب ايه
ع الملك والحاشيه ليه
ناسى ان ربه فوقه
حرفه ده مسؤل عليه
والكلام لو مس قلب
يبقى حرب بدون سلاح
يعنى مش حكايتى حظ
رافعةحرفى للكفاح
مش بخاف طب ليه ها اخاف
والجناح طار ف السحاب
يلعن العيشة الهباب
مرة امسك فيها علمى
ثورجية مالى باب
مرة اكتب عن حبيبى
واجعل الاشواق لهيبى مرة اقول ده العشق غول
وادى قدرة وادى فول
عيش وملح وجيت اغمس
فى السياسة الحرف لمس
شاف كتير معاه يهز
مره وسطه ومره كيسه
واكتب الاشعار تحمّس
ضد كلب البيه خسيسه
اجرى اقول يا خلق حس
واعمل انى فــ مرة كوديا
والمنجّم ده كوروديا
والعن الجهل اللى فينا
واجرى اعوم ويا السفينة
مرة بحر ومرة وردة
عود ريحان طالع منمل
وسط غابة من الوحوش
مرة اوصف فى الوشوش
وش مش محتاج لزينة
وش تانى
من النفاق لكن هارينا
وش طيب وش قاسى
والقى قلمى ليه مكمل
واوصف الدنيا بمقاسى
للهموم حوّش وحمّل
اصل قلمى ده مسكر
واجي ادوقه القاه ممرر
اصله بيقول الحقيقة
اللى دايما
طعمها سكر ممرر ..
