شاهندا البحراوي تكتب: يوميات رفيعه هانم والسبع أفندي

عدد المشاهدات = 2625

 انا النهارده حتكلم عن مشكله الحموات طبعا دي قنبله موقوته وموجوده في اغلب البيوت المصريه مش عارفه ليه كل اما اشوف واحده متجوزه الاقيها بتعاني من حماتها لدرجه اني لاحظت أنها بقت مشكله العصر، وانها اقوي من مشاكلنا مع الطاقة النوويه ومع الإرهاب ضد مصر ..وطبعا الله يرحمه اسماعيل ياسين لما طلب اننا نرحل الحموات كوريا الظاهر انه كان عنده حق لدرجه اني خفت لتكون موضه والاقي نفسي في يوم من الايام واقفه في الطابور وحاطه ايدي علي خدي وعماله اشتكي.. وجه علي وقت من الاوقات وقولت انا لازم تكون أول شروطي في العريس انه يبقى يتيم وأمي قالتلي مينفعش غير واحد يتيم بعد ما اتعقدت طبعااااا من كتر المشاكل الا بنشوفها وحكايات الرعب اللي بسمعها كل يوم..

 قررت احمي نفسي وإبتديت افكر هو الموضوع دا انتشر ازاي بالشكل الرهيب دا ليه..القضيه طبعا من قديم الازال وعالجها اسماعيل ياسين في فيلم "الحموات الفاتنات" اكيد عارفينه كلكم طبعااااااا وفكرت اننا لازم نشوف حل عشان الحلم الوردي لكل بنت ان يجيلها فارس الاحلام بحصانه الابيض ويخطفها عليه.. وقصه سندريلا المعروفه بدل ما تصحي تلاقي نفسها في حلم اسود ومنيل بستين نيله ولا تلاقي حصان ولا حمار حتي وتلاقي فارس الاحلام شبه عمو مسعد بتاع الأنابيب..

 ولما حبيت اشوف فين الحل وركزت مع اطفالنا وتربيتنا ليهم من الصغر للاسف لقيت المشكله فينا احنا إن اي راجل مهما كانت قوته أو احتوائه فهو اتربى علي ايد ست يعني اي عيب فيه من البداية حيكون فينا احنا كستات.. وطبعا المثل القائل ابنك علي ما تربيه وجوزك علي ما تعوديه دا صح 100% لان فعلا انتي الا بايدك تعودي جوزك علي كل حاجه بأسلوبك.. ولما نلاقي واحده كدا عاقله وربنا هديها وعودته تأتي بقا الرياح بما لا تشتهي السفن.. وتطلع بقا الحما بقواتها وتعتبرك امنا الغوله اللي جيتي وخطفتي ابنها منها..

 انا نفسي اقول للأمهات هنا كلمه.. ليه ابنك لما يكون إنسان متفاهم ومحتوي مراته بتعتبريه ضعف.. ومراته مسيطره عليه.. ليه مش تاخديها من منطلق انك احسنتي تربيته لدرجه انه اكرم إمرأه اسيره عندكم.. ليه من البداية متعلميش ابنك علي الاحترام والتفاهم وتصححي بقى اسلوب الرجولة اللي اتفهم غلط وتعرفيه ان امينه وسي السيد ماتوا ..وان سي السيد مكنش سي السيد ولا حاجه دا كان طول الليل مع الراقصات.. دا حتي في آخر الفيلم نزل من نظر ولاده..

 الحياه مشاركه.. وبلاش نفكر كدا خلينا كلنا نصحح اخطاء غلط في معتقداتنا ..ونقول ان حماتك مش عدوتك دي ممكن تكون احسن من امك كمان.. وبلاش بقى كل كلمه تقولها لك تطلعي تجري علي بيت اهلك وتلموا الدنيا عليكوا ..حاولي تغير نظرتك للموضوع وانها حتي لو غلطت فيكي انها امك.. وان اقل حاجه نعملها ليها بعد ما ربت وكبرت راجل احترمك وخلاكي ملكه في بيته.. اقل حاجه تعمليها ليه اننا نكرم امه..

 وطبعا ارجع تاني وقول للحموات بلاش فكره انها جايه تخطف حماده حبيب قلبك منك.. دي جايه تكمل اللي انتي ابتديتيه.. بلاش نفكر كدا.. وياريت بدل ما نرسخ في عقول اطفالنا ومجتمعنا معتقدات غلط من الافلام الهابطه دي نرسخ فكر ومنطق سيدنا محمد عليه افضل الصلاة والسلام ونعلم ولادنا ثقافه الاحترام ولغه الحوار.. انا شايفه من وجهه نظري سواء اتفق معي البعض أو اختلف اننا عشان نقدر نقضي علي الظاهرة اننا نعرف ان السبب الرئيسي والاول فيها هي المرأة.. سواء كانت أم أو زوجه.. انا بعترف بغلطتنا كستات بكل صراحه من غير عقد نفسيه.. بس طبعا الراجل عليه عامل اساسي وهو ثقافه الإحتواء..

 الإحتواء يا رجاله بكل معانيه.. مش الاحتواء ساعه ما تقع في مشكله بس.. وان احنا عشان نعرف نعيش صح لازم نخرج جيل صح متربي علي ثقافه الاحترام والاحتواء للمرأة.. وإن المشاركة ليها واحترامها واخذ رأي المرأة والحفاظ عليها دا مش صعف إطلاقا.. دا منتهي القوه بس ياريت نفهم ونبتدي صح!