الخميس , 28 مارس 2024

طالبة إعدادي تكشف المستور عن النظام التعليمى فى مصر!

= 3500

Egypt - Schools

 

انا طالبة فى الصف الأول الإعدادى وأكيد مش أول ولا أخر حد أتكلم عن مشكلات التعليم اللى بتقابلنا كطلاب فى مدارس مصر، الموضوع اللي شاغل ناس كتير والسؤال الى محير جيلنا والأجيال الى قبلنا
" ليه بلدنا مابتتقدمش فى التعليم ؟ " …
و طبعا بصفتى طالبة باحدى المدارس المصرية هديكم نبذة عن نظام تعليمنا المصرى باختصار وعن المساوئ اللى بنمر بيها خلال روتين اليوم الدراسى، على الرغم أنى مش فى مدرسة حكومية.
 
عمرك فكرت قبل كده ايه هو نظام التعليم فى مصر ؟

نظام التعليم فى مصر هو الى بيخلينا نحفظ الكتب عشان ننجح فى الامتحان مش عشان تنمية ثقافتنا ، وبذلك اول ما بنطلع من الامتحان بننسى كل اللى أخدناه خلال شهور الدراسة من حفظ ودروس وملل وروتين، وزى ما بيقولوا اساتذتنا الأعزاء " احفظ اللى فى الكتاب ان شاء الله عنك ما فهمت .." ، دا غير أن كل شغلتنا فى الفصل عبارة عن "كتًاب " …
وكراريس ملايانة بحاجات موجودة فى الكتاب ، بس ازاى لازم اما المدير يشوف الكتابة دى يتأكد ان المدرس شاطر وبيشرح ومش مهم بقى المعلومات مفيدة ولا لأ بنذاكر منها ولا لأ كل دى حاجات مش مهمة بالنسبالهم .

و من اصعب مشاكلنا التعليمية هى "الضغط": يعنى مثلا احنا عندنا ف المدرسة عرض هايل بيقول " اديهم درس ومعاه كل مستلزماته من واجب و امتحانات هدية "
وفى الامتحانات  بيكون عرضهم لينا هو " اديهم امتحان والامتحان التانى هدية "!

تخيل كده انك تصحى كل يوم الساعة 6 الصبح، ولو انت مرفه شوية هتصحى 7 , تقعد فى المدرسة مده من 6-9 ساعات وطبعا مش محتاجة اقولكم عن الكراسى اللى ف المدرسة اللى تجيبلك تشوهات فى العمود الفقرى بقيت حياتك, طبعا عدد الحصص 7-9 حصص فى اليوم والحصة مدتها ماتقلش عن 45 دقيقة .. والبريك بيبقى يادوب نص ساعة قصاد كل الحصص دى … بتبقى مش عارف تعمل ايه ف الوقت ده .. تاكل ولا تشترى من الكانتين اللى عادة بيكون عليه "هجوم" (مش عارفة يعنى ع كتر الحاجات اللى فيه !) ولا تدخل الحمام (اللى عادة بيكون مش نضيف) , ولو انت مرفه شوية هيبقى عندك طموح انك تلعب مع اصحابك.

تخيل كده انك تبقى ما صدقت جت حصة نشاط (ولو انها برضو بتبقى حصص ملهاش اى لازمة بس ع الأقل مش بنكتب) ويجى مدرس بكل هدوء وياخد الحصة وتفضل انت قاعد كأنك بالظبط قاعد ع "شوك" وعمال تفكر فى الحصة اللى اتاخدت وانت لا حول لك  ولا قوة.

جرب تسمع كلمة "يوم الحد امتحان" وتقول للمدرس انك عندك امتحانين يقولك "عندكوا جمعة وسبت ذاكروا فيهم " .. اصل المذاكرة دى "عقوبة" مينفعش ترتاح منها حتى يوم اجازتك (عشان كده احنا بنكره المذاكرة.. عشان بقت بالنسبالنا عقاب).. وبعد كدا تقعد لآخر اليوم تروح البيت الساعة 3 واحيانا كتير 4 .. والمطلوب منك بقى تتغدى وتعمل واجب لأكتر من 5 مواد (اللى عادة بيكون كتابة ملهاش لازمة) وتذاكر اللى اخدته فى المدرسة وتروح الدرس (الخاص) وأهلك يقولولك لازم تنام بدرى .

طب بالعقل كدا .. هل يعقل ان الانسان يصحى الساعة 6 صباحا ويعمل كل ده بتركيز من غير اى راحة ؟!

اكيد طبعا مش محتاجة اتكلم عن شنطة المدرسة وعقابها المرير اللى عادة وزنها مستحيل يقل عن عشرة كيلو واللى يضايق ف الموضوع اننا مش بنستعمل غير نص الى فى الشنطه بس،
واكيد بردو مش محتاجه انى اتكلم عن الحمامات الى مش نضيفة اللى اساسا بيبقوا قافلين المحبس بتاع الماية عشان "الاستهلاك" واحب أأكد عليكم ع نضافة الفصول اللى عادة بنبقى احنا عاملينهم قبل ما نمشى ( اصل الداده مش جاية عشان تنضف هى بس كل شغلتها تنادى ع الناس اللى ف الحمام وتقلهم "يلا بسرعة")

كل ده واحنا بنتكلم عن المدارس الخاصة "زى مدرستنا وبدون ذكر اسماء" اللى المفروض بتاخد فلوس تكفيهم وتكفى كميه الصيانات اللى بقالها اكتر من 13 سنة المفروض تعملها مابالك بقى المدارس الحكوميه بيعملوا فيها ايه !

يعنى من اساليب التعليم الفاشلة اللى بتحصل داخل كل مدرسة حكومية والاساليب غير الآدامية بالمرة اللى بيستعملوها المدرسين عشان يخوفوا الطلاب زى الضرب والاهانة اللى بيتعرضلها الاطفال اللى بتسببلهم عقد فى نفسيتهم ؟

ولا الحوادث اللى بنسمع عنها كل يوم والتانى فى النت وفى التليفزيون من تسمم وضرب حتى الموت وحاجات من النوع ده كتير تدل على انهم مش معتبرينا بنى أدمين، وللأسف غير انه نظام تعليمى فاشل، الا انه كمان نظام "اخلاقى" فاشل، يعنى لما تطلع الفصل تلاقى المدرس بيدخن وبعد شوية يطلع سجارة تانية، ويجي مدرس تانى يتكلم عن أضرار التدخين طب كدا بيعلمونا أيه؟

وبردو تلاقى حد معملش الواجب المدرس يفضل يشتم فيه وشتايم مقرفة… فماتستغربش لما تلاقى ولد سنه صغير بيشتم بشتايم زى اللى بنسمعها دايما فى الشوارع المصرية (اصل هو ده اللى بيعلمهولنا)..

انا متأكده ان فى ناس كتير عارفه الكلام ده وبتعانى منه وبتندم ع سنين ضاعت من عمرها فى تعليم زى ده..حاجات كتير اوى خلتنا نكره التعليم وللأسف … نكره بلدنا ..الكلام اللى بقوله ده صعب عليا اوى انى بقول مأساة بنعانى منها من سنين!

 

شاهد أيضاً

وزارة التموين: غدا آخر أيام الأوكازيون الشتوى 2024

عدد المشاهدات = 11336 تستمر وزارة التموين والتجارة الداخلية العمل بـ الاوكازيون الشتوي 2024 حتى …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.