حياتي اليوم صحيفة إلكترونية يومية
مش مبهر اللي بيجيب لخطيبته افخم الهدايا ويكلمها ليل نهار وينفذ طلباتها ومريحها ومش بيأمر وينهى وعامل فيها عنتر فجلة ، لان دا طبيعي جدا وبيحصل!
الانبهار الحقيقي انه يفضل يجيبلها نفس الهدايا .. ويفضل يكلمها كتييير .. ويهتم بطلباتها بعد الجواز ..
ودا مش بيحصل الا قليل اوي .. لان زي ماقولت مسبقا الي ميبنيش اساسات واخلاق العلاقة الي هي بتبني المشاعر ، عمره ماهيعرف يستمر علي حاجات مؤقتة.
المبهر حقيقي اللي بعد ما تبقي مراته ومعاه ووشه ف وشها طول اليوم ما يزهقش منها ولا يمل من كلامها ..
اللي يبهر فعلا اللي يفضل محسس مراته انها جميله ف عيونه حتي بعد ما خلفت عيلين تلاته.. مش على قد البرنسيسه بتاعة الخطوبة
المبهر بجد اللي بعد عشرين سنة جواز مش بينسي يوم ميلادها وبيجيبلها فيه هدية
المبهر مش اللي جابلك شبكة بمش عارفة كام وتبقي خايفه م الحسد .. دي ولا ليها لازمة اصلا ..
اصلا ايه الابهار ف الشبكة دي وهو جايبها مجبر عشان اهلك مش هيجوزوكي ليه من غير شبكة .. الانبهار الحقيقى لما يفضل فاكرك بعد الجواز
إيه المبهر ف واحد محترم ابوكي وامك و وشايلهم فوق راسه وشغال فيها ياعمي ويا امي وبتاع عشان يجوزه بنتهم !!
الإبهار بجد اللي يفضل شايل اهلك فوق راسه بعد الجواز .. ويبقي عون ليكي على برك لأهلك .. مش يقطعك عنهم ويبقي بيوديكي بالعافيه عند اهلك ..وكأنه عامل فيكي جميله عشان بيوديكي لأهلك
إيه المبهر ف واحد بيحبك هو مش بيشوفك غير ف أبهى صورك،وانتي مظبطه نفسك ولبسك وشكلك.دا لا شافك وانتي معيطه ومنكده،ولا وانتي منعكشه ومجهده،ولا وانتي صاحيه م النوم مقريفه،ولا وانتي تعبانه وشكلك مبهدل،طبيعي يحب الصورة اللي مفيهاش غلطة يعني لانه
الي بيظهر علي سطح الناس برا بيتها طول الوقت ، الناس بتحط في بالها انه هو دا الي هتشوفه في البيت هو هو طول الوقت .
المبهر بقا انه يفضل يحبك بعد الجواز بعد ما يشوفك ف باقي صورك كلها
المبهر بجد مش اللي مقضيها عزومات وكافيهات ف الخطوبه .. ..وطبعا بعد الجواز هيخرج مع صحابه اللي كان سيبهم طول فترة الخطوبة .. ويسيبك مع العيال ف البيت تشدي ف شعرك
المبهر هو اللي يراضيكي بعد الجواز
ايه الإبهار ف قصة حب انتهت بالجواز !! دي علاقة اتبنت علي ( مشاعر ) مش علي ( اساسات ) و اي حاجة مبنيه علي ( مشاعر ) سهلة الهدم .
الابهار فعلا هو الحب بعد الجواز والمسئولية والعيال ودوشتهم ومصاريفهم والسحل مع مشاكل الدنيا ..
- الانبهار الحقيقي في الحب ، هو الحب اللى بيزبد ويقوي بعد الجواز عشان بتكبروا سوا
اللهُم هَبنا حُباً يثبُت في القلبِ
ده بقى توضيح ليه العلاقة الي مبنية علي ( مشاعر ) مش ( اساسات واخلاق العلاقة ) بتكون مايلة للهدم بسهولة.
(نفس كلينك)
