الجمعة , 29 مارس 2024
يوم عرفه

كل لما نقرب من “يوم عرفة”… افتكر “سباستيان”!

= 2784

د. عمر حسنين

سباستيان ده شاب ألماني ، في أكتوبر سنة (2012) كان فيه سلسلة محلات ألمانية شهيرة اسمها (Saturn) ، الشركة دي عملت مسابقة كبيرة جدا لجمهور صفحتها على الفيسبوك احتفالا بافتتاح فرعها رقم (150) في ألمانيا !

الفائز بالمسابقة دي هيسمحوا له بدخول المحل لمدة (150) ثانية ياخد فيها (كل) اللي نفسه فيه مجانا !! يدخل المحل ، يشيل كل اللي عاوزه ، ويخرج بيه ببلاش !!

انتهت المسابقة وتم الاعلان عن الفائزين ، منهم شاب عنده (27) سنة اسمه (سباستيان) !

يوم المسابقة كان فيه تغطية اعلامية رهيبة ، وبدأت العد التنازلي للـ 150 ثانية ، وبدأت الناس تدخل تلم اللي تقدر عليه !!

ناس كتير كانت بتتكعبل وتقع ، وناس تشيل حاجات وبعدين ترميها وتاخد حاجات تانية ، وفيه ناس بقت تاخد اي حاجة أدامها ، وفي الاخر طلعت بحاجات ملهاش قيمة أوي يعني !!

لكن العجيب إن (سباستيان) دخل بمنتهى السرعة والنظام والتركيز ، وكإنه حافظ وعارف هو بيعمل ايه !! بقا يجيب شاشات كبيرة ويسحبها على برة ، موبايلات وتابلتس ولاب توبس وأجهزة من كل الأشكال والألوان ومن أفخم الماركات وأغلى الأسعار يحطها فوق بعض بترتيب عجيب ويخرج بيها يحطها على جمب ، ويرجع يدخل تاني !!

الناس كلها كانت مستغربة من أداءه واختياراته !!
لدرجة إنه في الاخر عرف كمان يسحب “تلاجة” بحالها ويخرجها لبرة !!

وبالفعل انتهت الـ(150) ثانية وخرج (سباستيان) وسط تهليل فظيع من الجمهور واترمى على الأرض من كتر التعب !!

حسبوا قيمة الحاجات اللي أخدها في الـ(150) ثانية دول لقوها تساوي (29) ألف يورو !! تخيلوا !!يعني 600 ألف جنيه تقريبا في دقيقتين ونص !!

أول كلمة قالها (سباستيان) بعد ما خرج :
” لقد نجحت استراتيجيتي” !!

لما عملوا معاه لقاء بعدها قال إنه من يوم ما سمع عن المسابقة وهو بيروح المحل كل يوم “يخطط” ويحفظ أماكن الحاجات الغالية اللي عاوز ياخدها ، ويرتب مساره وأولوياته وطريقه جوة المحل الكبير عشان يعرف يخرج بأكبر قدر من المكاسب خلال الـ(150) ثانية دول !

وبالتالي أول ما وقع عليه الاختيار .. كان جاهز !!
وكانت أول كلمة ليه بعد الانتصار ” لقد نجحت استراتيجيتي” !!

أهو أنا بقا كل ما نقترب من يوم عرفة ، أفتكر (سباستيان) وأقول : مش احنا أولى من سباستيان في التخطيط ليوم عرفة ؟!
سباستيان خرج بحاجات قيمتها 29 الف يورو في دقيقتين ، ياترى انت هاتخرج بايه من يوم عرفة ؟؟

قال الأوزاعي رحمه الله : أدركت أقواماً كانوا يخبئون الحاجات ليوم عرفة ليسألوا الله بها !

في الحقيقة بقا ، أنا مش عارف إزاي واحد يكون عارف قيمة وفضل يوم عرفة ومايكنش عامل خطة لاستثمار اليوم ده !!

إزاي تكون عارف أن ده أكتر يوم ربنا بيعتق فيه الناس من النار ، وده اليوم اللي ربنا بيباهي بعبادِهِ ملائكته ، وإن صيامُه بيكفر السنة الماضية والسنة القابلة ، وإن العمل الصالح فيه أفضل مما دونه من الأيام ، وإن خير الدعاء وأفضل الدعاء دعاء يوم عرفة ،

إزاي تكون عارف كل ده وماتكنش مجهز اللستة بتاعت عباداتك ودعواتك !!

والله يا اخواننا انا اعرف ناس حصللهم معجزات بسبب دعاء يوم عرفة !
أنا عن نفسي اليوم ده كان سبب تحولات كبيرة في حياتي بفضل الله سبحانه وتعالى !

جهز قائمة لكل ما تتمناه في دنياك وآخرتك وانزل يوم عرفة في أي مسجد هادي أو زاوية فاضية أو حتى أوضة فاضية في بيتك من العصر لحد المغرب واقعد اتكلم معاه !
احكيله واشكيله وفضفضله !
الاخ المديون ، الاخت اللي سنها كبر واتأخرت في الزواج ، المحروم من الانجاب ، المريض ، أم و زوجة الأسير ، اللي بيعاني من ضيق المعيشة ، اللي مش عارف يقرب من ربنا .. مستني ايه ؟؟ جهزت قائمة دعواتك ؟؟

قال عبدالله بن المبارك : جئت إلى سفيان الثوري عشية عرفة وهو جاثٍ على ركبتيه، وعيناه تذرفان فالتفت إلي ، فقلت له : من أسوأ هذا الجمع حالاً ؟ قال : الذي يظن أن الله لا يغفر له !

اللهم اغفر لنا ذنوبنا ، وأعتق رقابنا ، وأجب دعواتنا ، واغمرنا في فيض عفوك ورحمتك يا كريم .. آمين .

 

شاهد أيضاً

حكايات رمضان: حكاية الصوم

عدد المشاهدات = 7019  تكتبها: دعاء السيد ———————– احنا ليه بنصوم؟ ياتري علشان فعلا زي …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.