حياتي اليوم صحيفة إلكترونية يومية
مفيش أجمل من انك تلاقى شخص فى حياتك بيحسسك بوجودك وبيقبلك على أى حال تكون عليه وبيتحمل تصرفاتك مهما كانت …!
بتبقى معاه مش محتاج تقدم أعذار ولا تبرير لأى حاجة بتعملها لأنه ببساطة عارفك أكتر من نفسك ولأنه بيحبك ؛؛ بيحول كل شئ بتفقده إلى مزايا ودايما بتلاقيه لما بتحتاجه ….
وكتير فى حياتنا بنعيش مع ناس وبيتعاملوا معانا وبنحبهم وبيتعاطفوا معانا ورغم أننا أوقات مش بنبقى محتاجين منهم حاجة ! بس بيجى علينا وقت بنحتاج ليهم وبندور عليهم ولكن ….مش بنلاقيهم !
ونفوق على واقع مؤلم ان مفيش حب ولا صداقة بتبقى !!!
بنفقد كتير من اللى حوالينا لأننا ماقدرناش مع مين بنتعامل ؛ وبنفقد أشياء غالية ما قدرناش قيمتها فى وقتها؛
كنا بنعاملهم زيهم زى أى حد تانى بنعامله وماعملناش حساب أنهم مختلفين عن غيرهم !
كانت ردود أفعالنا وكلماتنا ؛حتى تعبيرات وشوشنا وأنطباعنا عنهم واحدة من غير ما نراعى ( نقطة الفرق) !
رؤيتنا للآخرين والأشياء بيربطها “خيط رفيع ”
نفسك هى اللى بتربطه من مجموعة نقط بتميز اللى بتحبه؛ بتتجمع ببعضها فى الخيط بتقرب المسافات بينكم ؛ وكل شئ بتعمله للطرف الآخر بيفرق معاه !
فكتير بنعيش مع اللى حوالينا وأحنا مش عارفين اللى ممكن نعمله ليهم ويفرق معاهم لأننا عمرنا ما شوفنا ( نقطة الفرق ) ؛؛وكملنا الحياة منهمكين فى قسوتها ومرارتها وفاكرين اننا كده عملنا اللى علينا !
وفجأة ؛؛ بنفوق نلاقيهم ضاعوا مننا لأننا
ضيعنا عمرنا فى انتظار أن اللى بنحبهم يتغيروا وماعرفناش نغيرهم ! ولا هما عرفوا!
ومش قادرين نسلم أنهم مختلفين عن غيرهم …. كل واحد ما كانش شايف التانى !
ضيعنا وقت فى انتظار أنهم يعرفوا أيه اللى بنحبه من غير ما نتكلم …سكتنا ؛؛
وفكرنا أنهم هيحبونا كده !
وكتمنا رغباتنا لحد لما فكروا يدوا….
ماكناش احنا اللى معاهم !
فى إنسان بيبقى جميل بس اللى حواليه مش بيقولوا انه جميل …فيخلوه ما يقدرش قيمة نفسه …وينسى انه جميل …لحد ما ناس تانية تشوفه وتقوله أنه جميل …
قدروا قيمة اللى معاكوا قبل ما يزهقوا ويروحوا لناس تانية تقدرهم….
“عندما تكون كنوزنا قريبة جداً منا،
فإننا لا نلاحظها أبداً،
أتعلم لماذا؟
لأن الناس لا يؤمنون بالكنوز! “
