حياتي اليوم صحيفة إلكترونية يومية
تعرف انك من ساعة ما جيت للدنيا ولحد ما هتمشى منها وكل خطوة بتمشيها مرسومه ليك ومكتوبه عند ربك؟
بس انت ماشي في طريقك ومش عارف ايه اللى جاي وايه اللى هيقابلك في حياتك.
بتبقى ماشى فى طريق مجهول بالنسبة لك، مهما فضلت تخطط لمستقبلك او طريقك أو لحلمك ممكن ميحصلش زى ما انت متوقع بالظبط.
بس لما يحصل عكس ما خططت بتبقى دى إرادة ربنا، وده اللى مكتوبلك يحصل من الأول، ومش المفروض عليك انك تزعل لأنه أكيد خير ليك.
بس ساعات بتقعد مع نفسك ويبقى حلمك انك تعرف حياتك هتبقى عامله ازاى وتقعد تتخيل، كتير مننا بيبقى نفسه يعرف ايه اللى هيحصل قدام شوية في حياته.
يا ترى هتنجح في شغلك ولا لأ، مين اللى هيبقى واقف معاك..مين اللى هيبعيك، مين اللى هيبقى قريب منك دلوقتى وبعدين هيبعد.
لدرجة ان فى ناس بتبقى عاوزة تعرف اما تموت ردة فعل اللى بيحبوهم هتبقى ايه.
كل دى حاجات طبيعية ومحدش فينا مش بتشغل باله وتفكيره ساعات.
فى حين ان بعض الناس عايشه اليوم بيومه، ومش بتفكر في اللى جاى، سيباها كده على ربنا، وبتصبر نفسها وبتقول: "لو علمتم ما في الغيب لأخترتم الواقع".
وفى النهاية، بعد تفكير طويل متلاقيش حل غير انك تسيبها على ربنا ويحصل زى ما يحصل، لأن خوفك من اللى جاي مش هيغير اي حاجة.
الحل انك تكمل في طريقك زى ما انت، وأعمل اللى عليك، واحسن الظن بربنا، وهو هيختارلك الأحسن والأنسب ليك فكل حاجة.
وفي الآخر .. هيحصل اللى مكتوبلك برضه!
