حياتي اليوم صحيفة إلكترونية يومية
————————
أصدقائي وصديقاتي .. من خلال محاضراتي وندواتي في التنمية البشرية.. والمرة دي من داخل إحدى المدارس الثانوية.. حيث لاحظت نوعا جديدا من انواع المشكلات الاسرية التي تم طرحها في الندوة من طالبة في الصف الاول الثانوي ألا وهي علاقتها مع والدتها ووالدها وشكواها من عدم التفاهم معهما نهائيا وانهيارها النفسي من هذه العلاقة..
مما أدى الي عدم تركيزها في دراستها مع العلم انها بتقول انهم “مش بيبخلوا عليها بماديات ولا حاجة”.. إذن المشكلة مش مشكلة فلوس.. لا مشكلة عدم اهتمام الأم والأب باحتياجات اهم بكتير من الفلوس..ألا وهي الحب والحنان والاحتواء اللي للاسف مش موجودين دلوقتي بحجة انهم طول النهار في الشغل.. ومش فاضين يقعدوا معاها يرغوا في كلام فاضي علي حد تعبيرهم!
وكمان شعورهم ان البنت بتتدلع ومش ناقصها حاجة.. وده أخطر حاجة لأن البنت بتبعد عنكم ..وبتنسحب شوية بشوية من غير ما تدروا.. وتبقوا مش عارفين في ايه.. وليه التغير ده.. وتحصل فجوة كبيرة..
فارجوكم يا أمهات ويا آباء انتبهوا.. البنت عايزاك وعايزة اهتمامك بكلمة حلوة.. بحضن يحسسها بالأمان بدل ماتدور عليه عند أي حد تاني.. ذي مابنشوف المشكلات اللي بتعملها..
وكذلك رجاء خاص بالأمهات.. انتبهي لبنتك.. ولاحتاجاتها العاطفية.. عوضيها بحنانك واهتمامك بيها.. واعرفي انك اللي هتزرعيه هتحصديه.. فازرعي حاجة حلوة.. علشان لما تكبري وتحتاجيها تلاقيها هي سندك وعكازك..والي لقاء قادم ويوميات أسرة مصرية.
- خبيرة تربوية ومدربة تنمية بشرية.
