ليه لازم نحذف أصدقائنا ع الفيسبوك؟

عدد المشاهدات = 5403

 

بقلم: شيرين فؤاد 

بعد تحديثي لقائمة الأصدقاء عندي في الفيسبوك…الناس إستغربت وبتسأل إزاي وليه حذفت أكتر من ٤٠٠٠ شخص وحافظت علي ٧٠٠ بس.. !

بكل صراحة هأقول الأسباب:

أنا بقالي 3 أيام بقوم بالمهمة دي.. واكتشفت إننا من غير ما نحس …صفحاتنا هنا والناس اللي عندنا بتتحول لنسخة من حياتنا اليومية او الواقعية..

ما بين ناس ملهمش لزمة – أو ناس مضطر ليهم عشان المجاملات والمصالح – وناس سايبهم وانت عارف اللي في قلوبهم ليك – وناس موجودين عشان يراقبونا – وناس مختلف معاهم في حاجات كتير بس مضطر عشان شغلك مثلا – وناس بنخليهم نقول عشان يشوفوا نجاحنا..

ده غير المهاترات والتنظير والادعاء..

لقيت الفيسبوك اتحول لنسخة من حياتنا بقيودها وزيفها.. ولقيت اني من غير ما احس مبقتش أنا.. روحي مبقتش منطلقة ولا على طبيعتي .. ومحطوطة تحت قيود في التصرف والقول بما يسمح بيه البرستيج والشغل والمصالح والمجاملات..

فقررت .. ونفذت.. وعلى الجانب التاني بدأت أضيف أشخاص لا كتاب ولا أدباء ولا صحفيين ولا إعلاميين.. لكنهم عقول شابة جميلة وواعية واهم حاجة بطبيعتهم وتلقائيتهم بيجمعنا بس الكلمة إللي تمس العقل والروح..

وبالمرة بقي أنا أيوة عشقي منير وعمر خيرت لكن أوقات كتير بسمع مهرجانات وبحب أغنية بنت الجيران وشيفاها حلوة..

وبشرب قهوة لكن مش وأنا بسمع فيروز ممكن وأنا بسمع وداع يا دنيا وداع.