حياتي اليوم صحيفة إلكترونية يومية
يا ريت بس كانوا أقارب
دي الناس كلها بقت عقارب
حتى اللي لابس بدل شيك
واللي متصور مع الكبار
واللي بيقول على نفسه “كبير البلد”
في قلبه حقد وسمّ نار
قالوا الكبيرة كبيرة بأصلها…
طلعت الكبيرة كبيرة بغلّها
حسد وكره ومصالح
وشوش كدابة بتتصالح
ولو المصلحة راحت
يبيعوك في ثانية
وينسوا العِشرة والملح والعيش
وينكروا المعروف بكل بجاحة
قالوا الزمن ده اتغير…
أنا بقول لأ…
الزمن زي ما هو
بس القلوب هي اللي اسودّت
والنفوس اتسممت
والناس الكبيرة…
اللي المفروض تكون قدوة
طلعت أخطر من العقارب
تلسعك في ضهرك
وتضحك في وشّك
وتعمل عليك وصاية وتقولك
“احنا الكبار وانتوا الصغيرين”
مع إنهم أصغر ناس في القيم والدين
قالوا الأقارب عقارب…
بس اللي صعب أكتر
إن البلد مليانة ناس عقارب
تدّعي الشرف والجدعنة
وقلوبها مليانة غِلّ وندالة
ولو شافوا في إيدك فرحة
يتحولوا شياطين على هيئة بشر
يبعِتوا عين ويحسدوا ويجرّحوا
ويتمنوا لك العوز والانكسار
قالوا الكبيرة كبيرة بأصلها…
يا خسارة الأصل يا زمن العجب
طَلعت الكبيرة بتقيس الناس بالفلوس
وبالكرسي… وباللقب
ولو حست إنك أحسن
تقوم تحاربك وتقول
“أنا وبس… أنا الكبير
ومافيش حد غيري يعلو في البلد”
بس أنا قلبي ثابت…
والحقد بيرجع على أصحابه
والسُمّ لو طال الغلابة
هينقلب نار تحرق اللي نفخه
والحق دايمًا هينتصر
ولو حتى بعد حين
واللي ظلموك…
هيندموا يوم ما يلاقوا نفسهم لوحدهم
والكرسي مش نافع…
ولا اللقب شافع…
ولا العقارب لاقية مطرح تهرب فيه
