حياتي اليوم صحيفة إلكترونية يومية
إهداء إلى…
#كريمة_عروس_المنوفية
عليها رحمة الله
———————-
عيشي
ما ادينا كلنا بنعيش
ولو يعني في يوم خانك
وحتى اتعدى أو هانك
متهتميش
ماهما حفظونا زمان
وقالو الست بتعشش كدة تعشيش
وتحفظ بيتها وتصونه
وتاكل اللقمة لو ناشفة وتلبس خيش
اعيش؟!
اعيش ازاي وانا باتهان
اعيش ازاي وانا عمري محستش معاه بأمان
لا عمري شفت حنية
ولا حتى في يوم طبطب
وحتى لما فكرت في يوم اهرب
قفلتوا ف وشي ابوابكم
ورجعتوني من تاني لايد سجان
اعيش؟!
اعيش ازاي وانا بتذل
دة أنا كنت زمان بحلم ببيت من ورد
حيطانه محبة وافرشهوله انا بالود
وعلى بابه اعلقله عقود الفل
صحيت من حلمي ولقتني
ف وسط قلوب ماليها الغل
قولولي ازاي تكون العيشة ويا الذل
اعيش؟!
هعيش حاضر
وهعمل للجميع خاطر
ومش اشكال انا خاطري يبات مكسور
ومش اشكال اعيش عمري في ظلم وجور
وهستنى
وهتمنى قوام يجي عليا الدور
لكن يومها محدش يبكي على موتي
ما انا صرخت ياما كتير وكنتو بتكتموا صوتي
وكنت بيكو بستنجد
عليا هتتحزنوا دلوقتي وتلبسوا اسود؟!
ملوهش لزوم
ولا برضو هينفعني العتاب واللوم
ميلزمنيش
انا دلوقتي فايتاكم
ورايحة اعيش
