حياتي اليوم صحيفة إلكترونية يومية
قاعد وحيد ف عزلة والناس حواليّا غياب
سكت الكلام م الضيق، والروح مليانة عتاب
كانوا زمان أحباب، والضحكة عامرة ببيوت
دلوقتي صوتي بيرجع… م الكسرة ماله صوت
كل الوجوه حواليا… لابسة قناع الريا
مين اللي صادق فيهم؟… ومين اللي باع الهوا؟
سابتني دنيا غريبة… عايزة تسرق خطاوي
والجرح في قلبي عايش… سايب علامه ف حكاوي
قلت الهروب أحسن… من عشرة مالها أمان
أهون عليا الوحده… م العِشرة وسط خوان
الوحدة مش موت يا ناس… الوحدة ستر الحكاية
أهون م جرح القريب… وضحكة مالها نهاية
في صمتي لاقيت نفسي… في غربتي شفت نور
الوحدة علمتني… إن الخداع مش يبور
اللي يعزّك بجد… يبان وقت الشدايد
واللي يخونك يسيبك… ف عز الدموع شتايت
يا قلبي خلّي عزلك… حصن م الهوا والرياح
محدش يستاهل غلاك… إلا اللي فيك ارتاح
وأهو اختياري العزلة… مش ضعف ولا انكسار
ده تاج كرامة فوق راسي… وسطر آخُر ف المشوار
هعيش مع نفسي صادق… لا غش ولا زيف كلام
والوحدة تبقى وطن… فيه الأمان والسلام
