صابر الجنزوري يكتب: المناضل الافتراضي

عدد المشاهدات = 5647

عايش فى العالم الافتراضي
عامل هيصة وروشة
ساعات تلاقيه محلل اقتصادي
يضخم التضخم ويزود الفوايد
فى البورصة يلعب ويخلل الودايع
طول عمره فهلوي وشاطر
نازل شتيمة وهيصة ودوشة
وزهقان من الغلا الاعتباطي
ما هو بقى ادارجي ومخللاتي
مع إنه حلانجي وانتهازي
***
المناضل الإفتراضي
كل يوم يهبد له هبده
على كام إشاعة وكام كدبة
ونصيحة من ورا قلبه
مع حكمة سارقها من جوجل أفندي
ماهو الواد فاكر نفسه حكيم
وهو ما يعرفش أنه خنقه
**
الناشط الإفتراضى
فاهم فى كل حاجة
وعارف كل الأمور
فى سد النهضة يفتي
و ف جدولة الديون
يصرخ ويقول تضخم
الحكومة لازم تغور
ماهو بقى محللاتي وعارف
سعر الخيار فى سوق العبور
***
المناضل الإفتراضى بيجاهد
فى تويتر والفيس واليوتيوب
يعرف إزاي يستغل الظروف
راشق فى كل بوست سمومه
الموضوع بقى شيء يحير
آخرتها إيه حد فاهم يقول
يا ما دقت ع الراس طبول
ولسا ياما نسمع وياما نشوف
**
المصيبة أن الكائن الإفتراضى
عارف بيعمل إيه
كل خطوة عنده محسوبة
كل كلمة يقولها ولا مكتوبة
او حتى قصيدة وقصة مشبوهة
وهات همز ولمز ورمز وتوريه
آل إيه ؟
إسقاط سياسي
يهلل ويكبر ويسخر أتباعه
يردوا على بعض بأضحوكة
وعندهم كل حال مايل
حسابه يجيله فى رسايل
وطول ما لدولار يتحط فى إيداعه
يعمل فيها بطل ويلسن ع أسياده
ينفش فى ريشه وجناحاته
مغرور بيعبد الفلوس
وغاوي شهرة وعامل طاووس
وكل مغرور وطاووس
نهايته معروفة
***
يا لناشط والمناضل الإفتراضي
عامل فيها بطل ع مين ؟
على بلدك وعلى ناسك ؟
ما داهيه وعايز تبقي رئيس ؟
إنت مش بس خبيث
ولا بطل على الورق والفيس
يا خسارة الورق
طلع فاضي
إنت بياع كلام
وكلامك يا المناضل الإفتراضي
مليان كلام فاضي