حياتي اليوم صحيفة إلكترونية يومية
الكلمة دى أول ما بتتسمع بنحس بثقة كبيرة وفخر من عمق معناها وأوقات كتيره بنكون محتاجين نعد مع نفسنا ونفكر شوية هو احنا فعلا سند لحبايبنا ولا مجرد لفظ مجازى بيتقال لكن فى الحقيقة بنكون عاملين زى خيال المقاتة اللى موجود فى الأراضى الزراعية لحماية الأرض من اى عدو خارجى منظر فقط بنخوف بيه أى حد غريب بس فى الحقيقة وجوده زى عدمة مجرد شكل عمره ما نفع الأرض بشئ ولا عمره زود محصول ولا حتى ساعد الأرض فى أنها تكون خصبة أكتر.
ولفظ سند مش مرتبط بالرجولة فقط اللفظ شامل الأسرة بأكملها سواء كان أب أو أم أو أبناء.
محتاجين نقف هنا ونسأل نفسنا شوية أسئلة
هل الزوج فعلا سند لزوجتة وأولادة ؟؟
هل الزوجة سند لزوجها وأولادها ؟؟
وهل الابناء اللى طول الوقت بيدور على حقوقهم هو أنتم فعلا سند لأهاليكم ؟؟
ولا اصبح كل تفكيرنا حاليا مقتصر على التفكير المادى الأب عشان يحس انه اكمل دوره على أكمل وجة أمام الأسرة والمجتمع أنه سبلهم شوية فلوس وبيوت علشان تحميهم وعلى فكره انا مش ضد فكره انك تأمن مستقبل أولادك بس ياريت قبل ما نأمن مستقبلهم بفلوس نأمانة بلأمان والإحتواء والحيطة اللى ميقدرش حد يكسرها الضهر اللى بجد اللى بنسد عليه عشان منقعش الحضن اللى بيخلينا نقوى فى كل مره أكثر من الأول التفاهم اللى بيخلينا نحتوى بعض اكتر ما نجى على بعض لا البيوت ولا الفلوس ولادك هيعرفوا يعملوا بيها حاجة طول ما هما ضعاف البيوت دى هتكون سجن ليهم مش حماية زى ما انتم متخيلين قبل ما نستثمر ليهم ياريت نستثمر فيهم حاول تبنى ولادك ومراتك صح عشان يقوم ما تقع تلاقى اللى يسندك بجد ما يكسركش.
وبالنسبة لدور الزوجة أو الأم حاولى تبنى نفسك وتخلى زوجك وولادك يسعدوكى فى البناء دا متحوليش تبقى هشة وكائن مستهلك عايش عشان ياكل ويشرب ونربى ولادنا ويصبحوا صوره مننا ونبرر دا بمقولتنا الشهيرة أعظم دور للست هو بيتها انا مش ضد الفكره بس ضد تنفيذها خليكى صريحة مع نفسك بذمتك عارفة تبنى بيتك وولادك صح ولا كل دورك تلبسى وتأكلى وخلاص متحوليش تكسرى قيمتك فى بيتك وتزعلى لما جوزك وولادك مع الوقت يعتبروكى عديمة الفائدة قبل ما تبنى جسمهم ابنى عقلهم وقلبهم ابنى ليهم هالة حماية مينفعش اى عدو يخترقها واعرفى أن زوجك هو إبنك الأول محتاج رعاية وإهتمام وإحتواء علشان ميدورش على أم تانية متحوليش تتعملى معاه على انه داخل بنسيون وبيدفع تمن قاعدتة أخر الشهر عشان ميجيش وقت وتلاقى نفسك بتكتشفيهم بالصدفة بعد فوات الأوان.
أما بالنسبة للأبناء متعتبروش نفسك انكم محتاجين الحماية وتتحولوا مع الوقت لكائن أنانى بياخد من اهله اكتر ما بيديهم ونبرر دا بأننا لسه صغيرين احنا جيل كبر قبل أوانه جيل عاصر وشاهد كل الثورات والكوارث وكان ليه دور كبير فيها قبل ما ندور على الحماية من أهلينا نفكر هل احنا كمان حمينهم قايمين بوجبتنا إتجاهم أهلينا اضعف مننا بكتير محتاجين هما كمان لكلمة شكر محتاجين لتقدير وتعبير عن حبنا ليهم محتاجين يحسوا بقيمتهم عندنا محتاجين لحضننا عشان نقويهم ونقوى بيهم
محتاجين نحس أننا فعلا كيان واحد مش كل واحد فينا فى إتجاه.
محتاجين نحس معاهم بلأمان محتاجين سند ومحتاجين نكون ليهم اقوى سند.
ياريت نتعلم نكون سند لكل اللى حولينا بلاش نكون حيطة مايلة اى حد يسند عليها تكسره.
