حياتي اليوم صحيفة إلكترونية يومية
اتكلمنا فى المقال السابق عن إن ازاى شخصين يكون بينهم قصة حب وتفاهم ومع الوقت يتحول الحب اللى بينهم لغربة وليس لبعد المسافة ولكن بعد القلوب هنتكلم فى مقالنا عن اسباب الغربة وكيفية علاجها ….
١- “التعلق المؤلم أو المرضى”
وهنا بيظهر التعلق لما بيكون فى طرف من الطرفين بيحب حب غير صحى طرف بيحب ويهتم اووى وطرف مش بيبادر نفس الأهتمام والحب ساعتها لازم هنا نقف ونوصل لمرحلة التوازن لان نجاح اى علاقة حب بيعتمد على نجاحها فى ان الراجل لازم يكون هنا هو الطرف الأكثر حماسا وحب ولازم الست يكون معاها مفتاح شخصيتة عشان تقدر توصل لقلبة بكل سهولة ومفتاح اى راجل هو الاحتواء والتقدير يعنى بسهولة ممكن نغير روتين حياتنا ونعمل تبادل للأدوار زى ما هو برا البيت الحماية والسند وتعب من تأديت دور الجدار يبقى لازم جوا البيت تكونى انتى رمز الاحتواء والسند مش الضغط
٢_”الخوف من الفقد وعدم الأمان”
ودى مش بنوصلها غير لما بنمر بتجارب نفسية صعبة سواء من جانب الأهل أو من تجارب سابقة وساعتها للأسف مهما كان قوه الحب وجود العامل دا بيوصلنا للغربة فالأفضل ساعتها قبل دخول اى علاقة لازم نوصل لحل مشاكلنا النفسية ونفصل بين اى تجارب سابقة وبين علاقتنا الحالية
٣-” كتمان المشاعر أو المشاكل “
هنا لما بيبقى فى طرف من الطرفين عايش جوا نفسه ودايما بيكتم مشاعره ومبيعرفش يشرحها ولا بيحاول يعبر عنها ويوضح أهمية الطرف التانى عنده فى الوقت دا عدم افصاحة بيوصل الطرف التانى للخوف والبعد لانه دايما حاسس بوجود حاجز بينهم ودا مع الوقت بيحول الحب لغربة وبعد بالتدريج
٤- “الانشغال الدائم او التعب النفسى”
وجود طرف منشغل طول الوقت عن الطرف التانى سواء بشغل او علاقات تانية بيخلى الطرف الأخر يحس انه مش أولوية وانه ثانوى فى حياه الطرف الثانى
٥- “اختلاف التوقعات”
ودى نقطة بتهدر رصيد الغلاوة من غير مقدمات وبكل هدوء لما بكون الطرف الأكثر حماسا وحبا ببقى متوقع ردود أفعال معينة من الطرف الأخر أختلاف رد الفعل فى كل موقف بيوصلنا للبعد وانتهاء العلاقة مع الوقت
٦_ “الفتور والتجاهل”
ودا بقى اقوى اسباب انتهاء الحب بيقتل الحب بدم بارد طرف من الاطراف يتجاهل سواء بقصد او من غيره دايما بيبص للعلاقة بمنظور الأنانية وحب الذات مع الوقت واستمرارية التجاهل بيحول الطرف التانى لشخص مش شايفة وبيحول الحب لكره او عدم راحه ومع الوقت بيتحول لغربه وبعد
اللى عايزه اوضحه من كل الاسباب دى فى النهاية ياريت لو حبينا شخص سواء صديق او حبيب وحبين علاقتنا بيه تبقى اقوى ومنوصلش لمرحلة الندم والخسارة ياريت نركز وناخد بالنا من الأسباب اللى مع الوقت بتكون السبب فى انتهاء علاقتنا وبتوصلنا لشخصين ممكن نكون اقرب اتنين لبعض جسديا لكن ابعد اتنين عن بعض روحيا.
