حياتي اليوم صحيفة إلكترونية يومية
عايزة أقول كلمتين لكن سامحونى عليهم..
كلنا شوفنا ان الناس اللى انتخبناها ما كانت على قد الوعود اللى وعدوها.. وكلنا شوفنا.. وعيشنا وحسينا.. ان صوتنا كان ليه تمن غالى هيدفعه كل غلبان غلبه الفقر وباع صوته لواحد قعد فى البرلمان خدم فئة معينة..
اوعى تلوم حد غير نفسك اللى ضحكت عليك.. وخليتهم أغلبية فى المجلس.. ومعرفناش نحاسب حد.. ولا حتى استفادنا من الناس اللى كانت بتتكلم باسم الغلابة..
صدقونى الأغلبية كانت مظبطة نفسها ومصالحها.. وطز فى الفقير اللى مش لاقى حد يدافع عنه.. وده ليه؟
لأننا فرطنا فى حقنا لما سمحنا لنائب يطلع على اكتافنا بماله.. واشترى صوتك بـ١٠٠ وبـ٢٠٠ وساعات أغلى أو أقل حسب دراستهم لاحتياجات المكان والناس..
يارب اللى فات يكون درس لينا جميعا.. وأنا أولكم واعرف ازاى اختار الناس اللى تناقش مشاكلنا.. وتحاسب حكومتنا لو قصرت.. وتستجوب وتستدعى الوزراء أمام نوابنا.. ويكون لمجلسنا هيبة بناس فاهمة وعندها خبرة وعايشه بين مشاكل الناس..
أصواتكم داخل المجلس هى اللى بتحدد مصائركم.. وبتسن القوانين اللى بيها بنحصل على حقوقكم.. يبقى ازاى نستهين بأكبر سلطة تشريعية؟ ونسلمها فى إيد اللى بيستثمر من وراها؟
كلمة صدق بقولها: احترم صوتك علشان تقدر تحدد مصيرك.
