حياتي اليوم صحيفة إلكترونية يومية
عمال برازي بـ سُكري
طعم الحياة المُرة
أقولك بحبك ” تِسْكَري “
بدل الكاسات مـ القُلة
أنا برضه بهرب من عنيكي ساعات
زي اللي خبي الشمس في الضُلة
دلوقتي يا ريما
بعد أما وصلنا للقرن الواحد والعشرين
بنقول : “الكذب جريمة”
بس نصدق مين ؟
دلوقتي يا ريما
بعد أما العالم كله إتحول أرقام
وبقينا بنسأل
1 + 1 هيطلع كام ؟
وبقينا نتابع
سعر النفط الخام
تفتكري هنتحول زومبا ؟
ولا دي كلها أوهام ؟
وإزاي هنقيس مسافات البُعد ما بينا ؟
تفتكري المتر هينفع؟ ولا نقيسها غرام؟
العالم كله إتلخبط
والقلم اللي بيكتب .. شخبط
والباب المقفول بالشوق
نمسك ف أيديه ونشعبط !
بس إحنا غلابة يا ريما
دلوقتي
لو حِسبتنا طلعت باتنين
تبقي جريمة !
