حياتي اليوم صحيفة إلكترونية يومية
بقلم / شاهندا البحراوى
مراحل انتهاء العلاقة عند المرأة اللى دايما بنطلق عليها الوداع الصامت لان الست لما بتوصل للمرحلة دى بتكون خلاص قررت النهاية بس للأسف بتكون نهاية غير معلنه وساعتها بتكون فى أقصى مراحل القوه مهما كان حبها وتعلقها بيك القلب ساعتها بيعلن عصيانه والعقل هو اللى بيحتل منصب الإدارة والنهاية هنا مش بتكون مفجأة للراجل ولكن هو اللى بيتجاهل علامات النهاية .
المرحلة الأولى وهى مرحلة “النكد”
ودى بيكون فيها الخناق والزعل كتير اوى وبيكون وراه كلام كتير محتاجة تقوله وتوضحة وهنا هى عايزه تقولك اهتم بيا حرفيا ودا بيظهر فى شكل خناق لو ركزت فى كلامها وقت الخناق هتفهم كل كلمه هى عايزه تقولها محتاجة منك ايه ودا بيظهر لما تحكيلك كل تفاصيلها وبتشارك معاك كل المشاكل اللى بتمر بيها وتدايق لو مسألتش ومهتمتش بكل تفاصيلها وفى المرحلة دى الراجل بيكون زهقان من كتر النكد والخناق والحساسية المفرطة بالرغم من أن الوحش فى المرحلة دى أن النكد بيزيد والراجل مش فاهم ايه بيحصل بس الحلو اللى فيها أن الست هنا بتحبك بكامل قوتها وأنها متمسكة بيك فوق ما تتخيل حاول تفهم المرحلة دى كويس وتحتويها لحد ما تتخطوا المرحلة دى سوا.
تانى مرحلة وانا بسميها مرحلة “الروقان”
هنا الست هادية اكتر الزن والنكد أقل اكتر الاتصال والمعافره والاهتمام قل اكتر بكتير والراجل بيكون مرتاح فى المرحلة دى بكتير عن الاول ومعتقد أنها قدرت تستوعبه وتمشى على مزاجه وأنها بقت اعقل بكتير وبيكون فرحان بيها اكتر وهنا احب ابشرك أن دى بداية النهاية بقت نصها معاك ونص برا بدأت تلم الباقى منها وبتحاول تخرج برا محيطك لو لسه هنا باقى على العلاقة وعلى الست اللى معاك حاول هنا تقرب اكتر بكل قوتك وقلبك وعقلك عشان تلحق الباقى منها.
المرحلة الثالثة والأخيرة انا بسميها مرحلة “الوداع المفاجئ أو الصدمة”
خلاص كدا هى وصلت للنهاية خرجت بكامل قوتها من العلاقة بقى وجودك زى عدمه مبقتش تعرف عنها حاجة كلامها معاك عام ملوش قيمة كله برود مفيش نكد ولا خناق نهائي.
خلاص سابتك بكامل قوتها من غير ذره ندم بقيت وراء ظهرها حرفيا مهما عملت مش هتعرف ترجعها هتستغرب من الجبروت اللى وصلت ليه.
اللى عايزه اوضحة هنا للرجل ان مش لازم العلاقة تكون كلها نكد وخناق عشان اعرف انها بتحبنى بس طالما العلاقة فى المجمل كلها تفاهم وانسجام وطبيعى يحصل خلاف على فترات بس لما يجى فتره والخلاف والنكد فيها يزيد عن المعتاد.
حاول تفهم الاشاره وحاول تعرف سبب زعلها وتحاول توصل انت وهى لنقطة تواصل عشان العلاقة ترجع زى الاول لو تجاهلت الخناق ومحولتش تفهم هى وصلت لدا ليه يبقى ساعتها انت بتخسرها بالتدريج وانت بكامل ايرادتك لان الست لما بتحب مهما كان مستوى ثقافتها أو تعمليها أو سنها هى طفلة مع من تحب هى كائن هش وضعيف فوق ما تتخيل الست مش بتظهر قوتها غير قصاد الرجل البعيد عن قلبها تماما طول ما انت جوا قلبها طول ما هى هتكون أضعف مما تتخيل لان دى فطرتها اللى ربنا خلقها عليها طول ما بتنكشك وتغير عليك فأنت جوا قلبها فخد بالك وافهم الإشارات.
