الشاعرة علياء هيكل تكتب: يا شمس لا تعاندى..!

يا شمس لا تعاندى…
يا شمس نهارى..
هدي..
متخليش اليوم يعدي
عندي لسه حبة
أماني..
ممكن أخد فرصه تاني..؟
خلي العمر
ما يجري..
سيبيه عايش ليوم تاني
سيبيه يحاول
عشاني..
متبقيش انت وزماني
اديني قلب فاضي
خالي..
لعمره حزن ولا بكي
ولا تاه وسط
الأسامي..
قلب أخضر
لا يحس غل ولا يقسا
ولا يعاني..
خليني أغير كل حاجه
خليني أخد فرصه
تاني..
نفسى أرجع عيله…
لا تعرف خوف ولا قهره
ولا تضيعها
الحكاوى..
ولا شافت قلوب بتتغير
وفيها الغدر شىء
عادي..
لا تعرف كره ولا غيره
ولا شافت وشوش عيره
ولا سمعت كلام
فاضي..
ولا ضحكايه مغشوشه
تعشم قلبى بمحبه
وفيها الغل
مداري..
ففى الأخر يضيع
..تاني
نفسى ابقا زى نجمه
يضوى نورها فى
ليالي..
ولا ورده ..
عودها أخضر ..تتسقي تتطرح
أغاني..
يااا شمس..
حساكي بتعاندي
وقاصده تغربي
بدري ..
فيعني ما كفكيش ذلي
ولا دموعى اللى
حرقاني..
خلاص.. ما دمتي بتكبري
وهُنت عليكِ
فى الآخر ..
وما دام أخرتها معروفه
ونفس الوصفه
موصوفه ..
وهى هى .. هياها
أولها زي
مرساها ..
خلاص يا شمس..
لا تهدي
ولا يفرق خلاص..
عندي
تهدي ولا ما تهدي
طلعتي ولا ما طلعتي
فلا عاوزه أكون
نجمة
ولا أرجع عيله
تاني
هسيب مكاني
واتاخر..
دانا نهاري خلاص
رايح..
وبكره ودع
امبارح..
فتهدي ولا ما تهدي
ولا تفرق ..خلاص عندي