شاهندا البحراوي تكتب: وجع الاختيار الخاطئ في الحب

أنا النهارده قررت أتكلم عن وجع الاختيار الخاطئ في الحب، الوجع اللي أغلبنا عايش بيه من غير ما يعترف. حب بيبان حي، لكنه في الحقيقة ميت… بس مع إيقاف التنفيذ.
إحساس جميل قوي لما تحب حد من كل قلبك، وتقرر إن الشخص ده هو الإنسان اللي ممكن تتنازل عشانه عن حاجات كتير في حياتك، لمجرد إنك ترضيه، سواء كان أخ، صديق، أو حبيب.
جميل إنك تشوف إنسان ضعيف قدامك، ويختارك أنت بالذات أول ملجأ ليه وقت الوجع. والأجمل إنك تفضل واقف جنبه لحد ما يقوى ويرجع أحسن من الأول.
لكن المخيف فعلا، إن أول ما يقوى… يكون هو اللي يكسرك، ويقرر إن رد الجميل يبقى كسر أغلى حاجة عندك: قلبك.
ساعتها بتبقى تايه، ضايع، ورافض حتى تصدق اللي حصل. والدليل إنك بتاخد أصعب قرار في حياتك: إنك تبعد عن أي حاجة ممكن تفرّحك.
وتخاف تقرب، وتخاف تحب، ويلازمك إحساس دائم بالضياع، وكأن الأمان بقى حاجة بعيدة ومستحيلة.
وفي اللحظة دي، بتكتشف نسخة منك عمرك ما تخيلت إنك ممكن تبقى هي. نسخة قاسية، حذرة، وخايفة. وده بيكون العقاب اللي قررت تعاقب بيه قلبك… علشان في يوم قرر يستغنى عن عقلك تحت مسمى الحب.
وتبدأ تستغرب سذاجة تصرفاتك، إزاي غيبت عقلك بالشكل ده؟
إزاي شوفت الدنيا من زاوية واحدة؟
إزاي لغيت كل القوانين، وسمحت لحد يدخل حدود حياتك ويخترقها بمنتهى السهولة؟
عارفين إحنا بنبقى عاملين زي إيه وقتها؟
زي واحد جعان، كل حلمه ياكل رغيفين فينو، وكل اللي معاه في جيبه تمنهم.
وهو رايح الفرن، لمح صاج باتيه متغطي بشيكولاتة، شكله مغري ومتلَف بالسلوفان.
ما كانش معاه فلوس يشتريه، فقرر يتنازل عن الرغيفين مقابل قطعة الباتيه.
وبعد تضحيات ومحاولات، وأخيرا وصل لها، وفرحته كانت كبيرة…
بس أول ما فتحها، اكتشف إنها بايتة، وإن الشيكولاتة اللي على الوش منظر وبس.
وساعتها ما كانش قدامه غير اختيار واحد: إنه يرميها.
وقتها بس فهم هو كان غلطان قد إيه لما ضحى باللي في إيده علشان حاجة “متغطية”، حلوة من بره، وفاضية من جوه.
كام واحد فينا ضحى برغيفين الفينو — أهل، صحاب، أو حد بيحبه بصدق — علشان اختيار غلط؟
وكام واحد وهو تايه، بيدور على الأمان والاستقرار، غرق وهو بيعبر، لأن السفينة اللي اختارها كانت مثقوبة؟
كام واحد خسر دهب أصلي علشان لمعة دهب قشرة؟
وكام واحد نسي نفسه وسط الزحمة، على أمل يلاقي حد يمد له إيده ويقوله: الطريق أهو؟
ما تحاولش توقف حياتك على حد.
وما تربطش سعادتك بشخص ولا بحاجة.
وما تستناش حد يمد لك إيده.
اختياراتك الغلط ممكن تكسرك… لكن وعيك بيها هو أول طريق النجاة.
وما تحوليش فرحتك بإيدك لفرحة هشة.
وافتكري دايما إن كتير من الناس اللي افتكرتيهم باتيه بالعسل… طلعوا في الآخر بسكويت مملح بايت.