حياتي اليوم صحيفة إلكترونية يومية
– ممكن اعرف سبب ارتفاع الاسعار كل يوم ويمكن كل ساعة؟
= مش احنا اللي بنرفع الأسعار.. الحرب هي السبب.
– السبب ازاي ممكن تفهمني؟
=علشان الحاجات المستورده يا فندم من روسيا و أوكرانيا.
– وإنتم لحقتوا تستوردوا بالغالي دي الحرب ما بقالهاش أسبوعين!!
= احنا عملنا حسابنا من أول يوم في الحرب .. لأننا هنستورد القمح بعد كام شهر بالسعر الجديد.
– طيب لأننا كنا بنستورد منهم القمح فالعيش ممكن يغلي .. إنما الفراخ تغلي ليه؟ والبيض يغلي ليه؟ والجبنه البيضا؟ والطماطم والخيار .. لا احنا بنستوردهم، ولا الحرب طالت مزارعهم!
= ما دام المستورد بيغلي والناس بتشتري .. يبقي ليه ما نغليش المحلي وبرضه الناس هتشتري!
– وقعت بلسانك ..يعني مش الحرب هي السبب، وانتم اللى بتنتهزوا الفرصه لزيادة مكاسبكم وأرباحكم.
= يا فندم احنا في سوق مفتوح والشاطر اللي يعرف يركب الموجة.
– يعني مش خايف من الأجهزة الرقابية والحكومة؟
= صباح الخير يا أستاذه احنا في سوق مفتوح، والتسعيرة الجبرية اتلغت خلاص، وكله عرض وطلب.
– طيب وضميرك؟ ازاي يسمح لك تستغل الناس وتبالغ في الأسعار.
= ضميري مرتاح وبيسمح لي .. إذا كان الناس بتسمح لنفسها تشتري بالغلا .. أنا هاكون أحن عليهم من نفسهم!!
– معاك حق .. إنت جبت التايهة العيب في الناس، هما اللي بيشتروا !! العيب في الناس .. هما اللي بياكلوا ويشربوا علشان بيجوعوا !! وهما اللي بيشتروا هدوم تسترهم !! وهما كمان اللي بيركبوا مواصلات!!
ياريت الناس تبطل الحاجات دي كلها، وتبطل تعيش زي البشر علشان نخلص من جشع التجار!!
اللي بيقولوا انه هو السبب الأول والأخير للغلا والكوا.
——————
* مدير تحرير أخبار اليوم.
