حياتي اليوم صحيفة إلكترونية يومية
احترت واحتار دليلى كله ملخبط فى كله هوه ايه الموضوع؟ مين عايز مننا ايه؟
فجأه كله بيقولك الرشاقة وبرضه فجأة يقولك ازاى تكونى طباخة ممتازة.
لكى يا سيدتى أفضل الطرق لعمل المحاشى والبشاميل والحادق والحلو والصوانى والطواجن والتورتات والحلويات وكلها مقاديرها بسيطة وسهلة.
ومتحرميش نفسك من حاجة بس لازم تكونى رشيقة انيقة وخفيفة زى النسمة.
برامج مخصوصة؟! لا دى قنوات مخصوصة وكله بيعيد ويزيد ده أكل آسيوى وده ايطالى وده هندى وده يونانى, وكل ده عشان تتعلمى ازاى تعملى اكل احسن من اكل المطاعم وازاى تصرفى مصروف الشهر فى نص ساعة.
وفي نفس الوقت ازاى تلبسى احدث الموضات وتجيبى افخر الأدوات وتعملى اشهى المأكولات, على موسيقى هادية واضاءة حالمة.
ولا غسيل اطباق.. ولا بس ياواد وبس يا بت.. يا سلام ما الحكاية سهلة اهيه..بس انتى اوعى تاكلى من اللى بتعمليه والريجيم تلخبطيه.
لا خلاص بلاش نشوف قنوات تانية.
ومعانا الدكتورة فلانة الفلانية هتقولك ازاى تخسى بأنظمة جهنمية ومعاها الخلطة السحرية اللى هتخسسك 10 كيلو فى ثانية.
والفقره الجاية معانا الشيف الهايل هيعملنا المحشى والرقاق والفطاير.
بس وانتى بتاكلى خلى بالك من السعرات واحرقى الدهون بالرياضة واشتركى فى نادى واجرى فى التراك.
ليه ثقافتنا كلها بقت ثقافة مطبخ!
مين قال ان أهم حاجة للست هوه المطبخ وبس, وان ازاى تعمل أكل اشكال وألوان.
وكأن حياة الناس وهموم الدنيا بتتحل بالأكل.
وان البنت لازم اول حاجة تتعلمها هوه الطبخ واصوله, مش ازاى تعرف وتتعلم تكون بيت وتعمل اسره سليمة.
حياتنا مش اكل وبس, فى حاجات تانية كتير مهمة.
فليس بالأكل فقط يحيا الانسان.
