الجمعة , 22 يناير 2021
الرئيسية / بقلمي / داليا جمال تكتب: إهتزت الصورة..وطلعوا مقلب!

داليا جمال تكتب: إهتزت الصورة..وطلعوا مقلب!

= 2206

نمنا في أمان الله واستيقظنا علي أحداث لا يصدقها عقل . هجوم متظاهرين علي الكونجرس الامريكي وإقتحامه بتقولوا إيه يا ولاد؟

الخبر صحيح.. وموجود في كل قنوات الأخبار العالمية!! الصور والفيديوهات بتقول كده واحنا مش مصدقين عنينا . والمعروف عن الشعب الأمريكي أنه شعب لا يتحدث في السياسة أبدا وأنها ليست من اهتماماته مهما كان مستواه التعليمي او الاجتماعي ، وآخره في السياسة التصويت في الإنتخابات فقط .

هو صحيح ممكن يكسر الدنيا ويتظاهر عند الإعتداء علي مواطن أسود أو لأي تجاوز قانوني في حق المواطن الأمريكي .. لكن للسياسة لأ .. ويا أخي مناظر المتظاهرين ماتقولش ناس بتفهم في السياسة أبدا إنما كانت مناظر زي ما تكون من حواري شيكاغو أو مشردين من أحياء نيويورك الفقيرة من مدمني الخمر والمخدرات .. مناظر لبشر لا يمكن أن يهتموا او يعملوا مظاهرات سياسية!! بالذات الأخ اللي كان لابس هولاكو ومركب قرون .. وكله كوم والناس اللي كانت بتمشي علي الحيط كوم تاني !

ولا الأخ اللي كان بيسرق منصة الكونجرس !!

أكيد هيبيعها في سوق (الفرايداي) بتاع أمريكا . واللي جايين يتظاهروا علي خيل وحمير .. المظاهرات إستمرت كام ساعة لكن شوفنا العجب . لدرجة شماتة أبله ( ظاظا ) هي وكل دول العالم في ماما أمريكا اللي عماله تعلمهم الأدب وإزاي يتعاملوا مع المتظاهرين !!

الحقيقة إن شكل امريكا إهتز في عيوني وعيون العالم وعيون سكان الخصوص ومنيل شيحة ومنشية ناصر، من هنا ورايح ماحدش يعلي علي حد، ولا دولة تتمنظر علي التانية، بعد ما تساوت الرؤوس.

أمريكا بجلالة قدرها طلعت زيها زي بلاد الواق واق ، وأسوأ من جمهوريات الموز .. أموت واعرف كانوا مخبيين المناظر دي فين؟ ولا ترامب جابهم منين؟ و ياتري هنشوفه في حفل تنصيب بايدن الأسبوع القادم ولا هيعمل زي ما عمل مع المتظاهرين وقالهم إطلعوا علي الكونجرس و(إنتظروني انا مش جاي)؟

———–
* مدير تحرير أخبار اليوم

شاهد أيضاً

عبدالرزّاق الربيعي يكتب: بحثا عن اللؤلؤ المفقود!

عدد المشاهدات = 1643  قبل أن تمحى حكايات البحر من ذاكرة الخليج، سارع الكويتي خالد …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: