أيام بتعدي والحياة ماشية
ما فيش حاجة بتقف والعجلة دائرة
ناس راجعة وناس رايحة
وناس تعبانة وناس فرحانة
وناس فيها اللى مكفيها ومش دريانة
ولا يعرف وجعهم إلا اللي خلقهم
وتسأل نفسك يا ترى كل واحد فينا رايح لحد فين
ويبقى السؤال لحد إمتي نفضل ماشيين
إحنا لو كنا نعرف إمتي ماشيين كنا نروح صايمين
لكن ربك له حكمة في دنيا واخدانا مجروحين
ناس تحس في بلدك بالأمان
وناس تاكلها الغربة من الحرمان
يا دنيا انا عارفك
المتغطي بيكي عريان
واللي باقي عليكي خسران
يا دنيا كفاياكي جرح في الغلبان
بطلي تبقي عفية على الحيران
لما ييجي عليك الشتا بيبقى سقعان
وشمسك يا دنيا في عز الصيف تموت الحران
قالوا انك غدارة وقاسية وان مكانك امتحان
يا دنيا عشرتك مرة وناسك أمر منك علي الضعفان
طبعك غريب يا دنيا بتكسري في عضم الغلبان
ده احنا ضيوف عليك في رحاب الرحمن
يكفيني شرك يا دنيا واشرب من كاس النسيان
بقلم: أماني الروميسي