الجمعة , 29 مارس 2024

كبسولات مهدئة…(الشخصية الساذجة)…تكتبها رشا صيرة

= 3802

لما بنلاقى حد بيثق فى اللى حواليه بشكل مفرط وبيمشى وراء كلامهم بنقول عليه ده من برائته …!
ولكن لما بيتأذى ويتنصب عليه بنقول عليه ( ساذج ) !!!

السذاجة ضد البراءة ؛؛؛
البراءة هى سمة أو خاصية لشخص لا يخطئ ولا يفسد بالشر أو الحقد ! زى براءة الأطفال …
فالشخص البرئ غير ضار وله طبيعة جيدة وأكتر صراحة ومباشرة وهو مش جاهل؛؛ بل هو نقص المعرفة والمعلومات والتعليم أى شكل من أشكال عدم الكفاءة .

أما الشخص الساذج …
هو شخص بسيط يفتقر إلى الخبرة والمكر والخديعة ما عندوش أفكار غادرة أو ماكرة ولا اى حيل لخداع اى شخص ؛؛
لكن مشكلة السذاجة انها بتضر أصحابها لأنها أسوأ صفة ممكن تكون فى الإنسان وبتنتج من عوامل عديدة منها التربية الخاطئة والخوف الزائد أو الكسل وقلة الخبرة فى التعاملات ..
بتظهر صفات الشخص الساذج فى :

١- الساذج…. تعاملاته مع الكبير والصغير بنفس الطريقة والمنهج ولا يعرف التفرقة فى طريقة التعامل .
٢- الساذج…. بيتكلم فى كل شئ مع الجميع مالوش أسرار كل اللى يعرفه بيكون عارف عنه أموره المادية والأسرية والعاطفية ويثق فى الجميع على حد سواء .
٣- الساذج ….مش بيفرق معاه رأى حد فيه ولا حتى بيحاول يغير رأى الآخرين فيه !
لانه مش بيحاول يجهد نفسه بالتفكير أو السعى وراء فكر الآخرين .
٤- الساذج…. كل الناس بالنسبة ليه مصدر بهجة …مش بيتأثر بالأحداث ولا بيشيل هم لاى موقف ولا اى ظروف ، موقفه مع الجميع واحد لا يتغير حتى لو المواقف نفسها أتغيرت !
٥- الساذج…. مالوش رأى فى اى موقف ولا بيحاول يعرض رأيه لانه لا يملك القدرة على تكوين رأى ، وبيسمع لأراء الآخرين وبيمشى وراها وبينفذها من غير اى تفكير !
ومن غير ما يكون عارف الرأى ده هيضره ولا هينفعه !
علشان كده بيكون معرض للنصب لقلة تفكيره !!
٦- الساذج ….مستمع فقط وسط الجميع مش بيتعب نفسه بالتفكير !
٧- الساذج …. متسامح لدرجة غير مقبولة ؛؛ يتسامح مع الجميع مهما أرتكبوا من أخطاء وبيقبل كل الإهانات والمهم عنده يبقى على علاقة مع الناس .
٨- الساذج …. لا يعرف الكذب فهو طيب بفطرته …صريح بشكل زائد عن اللزوم …بيقول
الكلام بشكل بسيط بدون مجاملة وده اللى بيخلى البعض يأخد صورة سيئة عنه !

لو انت جواك شخصية ساذجة وحبيت تتخلص منها ابدأ أفتح عينيك على العالم أكتر ووسع رؤيتك للعالم لأنك دايماً نظرتك للأمور كانت ضيقة ومن منظور خبرتك المحدودة فى الحياة ،
تفاعل أكتر مع الأشخاص اللى بيعيشوا فى بيئات مختلفة عنك وليهم تجارب أكتر ويقدروا يساعدوك على فهم العالم ؛ بس من غير ما يتحكموا فيك !

انت ممكن تكون اتربيت ونشأت فى مستوى إجتماعى ثرى ولكنك كنت قليل الحظ فى الاستفادة من مستواك ، أو كانت نشأتك فى مدينة صغيرة وماعندكش دراية بأنماط الحياة الحضرية !!
خروجك لعالم أكتر تحضر ممكن يخليك تشوف ثقافات ومعرفة أكتر وتكوينك لصداقات بين أشخاص جدد هيساعدك على تنمية التعاطف مع جميع البشر واحترام معتقدات وثقافات أخرى وتعلم لغة اجنبية جديدة وطرق فى التعاملات والذوق العام والعادات وأختلاف وجهات النظر ….
كل ده هيخليك تتعلم أكتر ما كنت بتستمع إليهم !

ابدأ فى تغيير نمط حياتك لان التعود على فعل الأشياء دائما ً بطريقة معينة قد يكون من الصعب حتى على نفسك تغييرها أو أكتسابها لقدرات جديدة أو بيحبطك وبيفقدك القدرة على الخروج من الدايرة اللى كنت فيها !
مش معنى أنك مرتاح فى حياتك العادية أنك تفضل قابلها ! حاول يكون لك شئ أستثنائى فى حياتك بتسعى إليه ! ومجرد خروجك من منطقة الراحة هيعيد تنشيط حياتك وتواصلك مع جزء من نفسك كنت دايماً مخليه فى حالة خمول !
حاول تشارك فى عمل تطوعى يكون له آثار إيجابية على صحتك البدنية والعقلية …

ولو قدرت تخرج من دايرتك هتقدر تفهم ان فى ناس طيبون وأشخاص سيئون وهتقدر تفهم الأشخاص من حولك مع الوقت .

وابدأ لاحظ تعاملاتك معاهم قبل ما تثق فيهم أو تحكم عليهم أنهم مخلصين ؛؛؛ سيب لنفسك فرصة أنك تشك فى تصرفاتهم حتى يثبتوا لك انهم جديرين بالثقة ومحدش يخدعك أو ينصب عليك !
حاول تحذر من الأشخاص الجدد فى حياتك اللى بيقربوا منك وبيكونوا مهتمين بيك بشدة وبيحاولوا يعرفوا الكتير عنك بسرعة كبيرة ! الناس دى ( علامة حمراء) بالذات لو بيهتموا بحياتك الشخصية أو عملك أو وضعك المالى وبيحاولوا يظهرولك ان ده أهتمام !
علشان كده خلى أسرارك لنفسك لان أكتر الساذجون بيثقوا فى الغرباء بسرعة كبيرة ؛؛ وحاول تختار أقرب صديق أو قريب للثقة …
حاول قبل ما تتكلم تفكر فى كلماتك علشان ما تندمش على كلام ما كنتش عاوز تقوله !!!

اتعلم تقرأ الناس ….الكلمات ١٥% من أتصالاتنا، ٥٥% لغة الجسد ، ٣٠% هى نبرة الصوت .
واعرف ان كل شخص مسؤول عن سلوكه وأفعاله …حاول تتغير لكن اوعى تفتكر أنك هتغير ولا تصلح أحوال غيرك!!
السذاجة مش هتتغير من يوم وليلة …علشان كده؛؛: أدى لنفسك فترة من الوقت علشان تتكيف مع تغيرك واستمر فى اكتشاف علاقات جديدة علشان تقدر تكون عندك قدرة على الحكم على نوايا الآخرين .

“إن ما يبدو لأعينكم أضعف ما فيكم وأكثره اضطراباً.. هو فى الحق أقوى ما فيكم وأشده ثباتاً”
(جبران خليل جبران)

شاهد أيضاً

كبسولات مهدئة| عقدة النقص … تكتبها رشا صيرة

عدد المشاهدات = 16433    لما بنلاقى حد بيفتخر بحاجات عنده ، وبيألف قصص نصها …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.