حياتي اليوم صحيفة إلكترونية يومية
علشان ناخد اللى عاوزينه لازم نتواصل مع اللى حوالينا …
للتواصل نوعين :
نوع ( أنا وأنت) يعنى كل واحد له كيان واضح ومختلف وبنعرف نتواصل مع بعض ..
ونوع تانى باكون (أنا -الشئ) يعنى أنا كيان وأنت مجرد أداة لسد الأحتياج وبس !
وده تواصل استغلالى (د.عماد رشاد)
احنا بنتعامل مع الناس طول الوقت بمزاجنا أو غصب عنا علشان أمور كتير تمشى فى حياتنا بس دايماً فى وقت بعد التعامل بتحس ان محدش فاهمك ؛ أو تحس أنهم بيتصرفوا بشكل غريب !
وأنك لو كنت مكانهم كنت هتتصرف بطريقة تانية يمكن علشان تفكيرك مختلف عنهم وأوقات بتعدى الموضوع بس فى ناس بتعمله مشكلة !
وبيحصل صراع وخلافات بينهم وكل واحد بيشوف ان رؤيته وطريقة تفكيره هى اللى على حق !
وعلشان كده اللى هيفتكر ان فى حياة من غير خلافات هيعيش واهم !
ومش معنى ان مفيش اتفاق بينا ؛ أننا مش هنتفق ! لأن الخلافات لازم هتحصل!
فى مقولة لـ ( ألبرت انيشتاين) بيقول فيها:
(لا يمكننا حل الخلافات بنفس طريقة التفكير التى استخدمت فى إيجاد هذه الخلافات).
كل واحد منا اتخلق واتربى فى بيئة ووضع ثقافى مختلف عن التانى وأثرت فيه تجاربه الشخصية اللى مرت فى حياته اللى خلت له نظرة
لأمور كتير فى حياته تختلف عن نظرة المحيطين بيه؛ شاف منها الخطأ والصواب والجيد والسيء والمناسب وغير المناسب ؛؛
وبالرغم من انها شكلت فكره إلا انها حصرته فى دايرة كتير مننا بيفضل حابس نفسه فيها وبيرفض أنه حتى يستوعب ان فيه رأى مختلف عن رأيه ! وده بيعمله أرتباك لما يكون مش قادر يقنع حد برأيه ومش بيقبل أنهم مش قابلين رأيه!
المشاكل بتحصل علشان كل واحد بيفترض ان الناس شايفين العالم زى ماهو شايفه ولما بيحصل الخلاف كل واحد بيتهم التانى بالغباء !
بيتعاملوا مع نفس الموقف بس كل واحد بيشوفه بصورة مختلفة ومحدش بيشوف الصورة الكاملة للموقف !
الحياة صورة مليانة اجزاء محدش بيستفيد من كل جزء غيره شايفه ولا بيدى نفسه أنه حتى يفهمه بل وبيحجر عليه وبيعانده !
محدش صح دايماً وعلى غلط على طول
ولكن …
كل واحد شايف جزء من الحياة مختلف عنك ومؤمن بأنه على صواب وهى دى الحقيقة اللى ممكن تقلل الخلافات وتخلينا نقبل تصرفات وأخطاء البشر ؛؛ وان أخطاءهم مش نتيجة شر جواهم بل ممكن تكون نواياهم سليمة ولكن سلوكهم بيتعارض مع اللى احنا بنتوقعه منهم !
وغلطتنا اننا مش فاهمين وجهة نظرهم وما عرفناش اننا نقنعهم بالأسلوب المناسب اللى بيريحنا !
علشان كده لما توصل للمرحلة دى بلاش تحاول تتناقش مع حد بنفس أسلوبك …فلو عاوز تنهى الخلاف حاول تناقشه بأسلوبه وأكيد أنت اللى هتكون كسبان على الأقل قدام نفسك ؛؛ لأنك اللى شوفت أجزاء الصورة من كل الجوانب .. وحاول تسمعه علشان توصل لكل حاجة جوه نفسه وتعرف مفتاح شخصيته …
لأننا دايما عمرنا ما بنسمع غيرنا وبنقاطعهم علشان عاوزينهم يتكلموا بعقلنا وبنديهم مفاتيحنا يتكلموا بيها !
لو نجحت فى أنك تجبر غيرك على اللى أنت مقتنع بيه ؛ وحرمته من رأيه وكيانه ؛
هتحرم نفسك من أنك تلاقى حد بيضيف اختلاف فى حياتك !
