حياتي اليوم صحيفة إلكترونية يومية
أعلنت الحكومة أنها تدرس تحديد مواعيد الغلق للمحلات والمقاهي والورش بعد انتهاء أزمة كورونا، يا دين النبي…. هو ده قرار محتاج دراسة !!
ده قرار لازم يتنفذ فورا وإلي الأبد .. ودي هتكون أكبر فايدة عادت علينا من أزمة كورونا .
ندرس إيه وكل دول العالم المتقدمة والمحترمة تغلق كل أنشطتها الاقتصاديه الساعة السابعة او الثامنة مساء .
ويكفينا توفير الكهرباء التي تهدرها المحلات، و توفير بنزين و سولار العربيات اللي دايرة في الشوارع لحد الصبح .
و بالمرة.. نرحم نفسنا من التلوث والضوضاء اللي قربت تجنن الناس، فأصبحت سلوكياتهم عدوانية.
وادينا جربنا وقت الحظر ازاي الشوارع بتكون هادية واكثر أمانا .. وياريت نسأل نفسنا هو مين فينا بيعرف يركن عربيته تحت بيته بسبب محل فاتح لحد نص الليل؟
ومين فينا لم يفاجأ بكوفي شوب فتح جنب بيته وسود عيشته من الضجة ودخان الشيشة والمتسكعين حول الكافيه لوش الصبح.. تقولش ملهي ليلي !
وياسلام بقي لو فاتح تحت بيتك ميكانيكي ولا كهربائي سيارات .. في الحالة دي لو انت ساكن في الدور العاشر مستحيل هتنام من أصوات الدق ولا الشتائم والالفاظ النابية بين الصنايعية .. ده غير الفوضي في الشارع بسبب العربيات اللي بتتصلح .. واللي يسألني ( بيحصل فين ده ؟ ).
أقوله… انظر حولك في كل حته في الأحياء الشعبية، و موجود في المهندسين والزمالك وجاردن سيتي، مليانين كافيهات وورش ومحلات لاتغلق أبوابها قبل ساعات الصباح الأولي، ده إن قفلت !
وأحب أطمن أصحاب المحلات والورش والكافيهات أنه لن ينقص من رزقهم شيئا ..ولكن بدل ما بيسهر للصبح ويفتح المحل علي الضهر . هيقفل بدري ويفتح بدري .. والرزق هو هو.
أظن.. الموضوع محسوم وأي مواطن مصري يتمناه .. إلا إذا كان مواطن من سكان الكومباوندات .. وليس له علاقه باللي بيحصل في البلد . ويا خوفي ليكون صاحب الدراسة منهم!
الساده أصحاب المسؤلية… هذه الفرصة لن تتكرر كفاية دراسة .. واطلعوا بالقرار.
—–
* مدير تحرير أخبار اليوم.
