حياتي اليوم صحيفة إلكترونية يومية
عندما يغيب عدل الحياة يحكمنا حكم الأنا البشرية اللي بتتحكم في اللى حولها علشان تحقق كل ما تريده وترغمها علي ما تفعل!
كل واحد له قدرات وحدود واللى كنا قادرين نستحمله في وقت من الأوقات بقينا مش قادرين نتحمله في وقت تانى! جايز لأننا أتغيرنا،، في قلوبنا أو في عقولنا أو حتي في درجة تسامحنا….
فلما تفقد حاجة ده معناه أنك عاوز اللى يعوضك عنها وعن أحتياجك ليها وانك تاخدها وتلاقيها بالشكل اللى يرضيك …وده … مش معناه أنك مش حاسس بباقى النعم!
اللى بيجيلك و بيحب يشرب القهوة وبتكون مش عندك لأنك مش بتحب تشربها!
ما ينفعش تقوله مفيش؛؛
أصلى مش بأحبها أشرب شاى وخلاص!
على قد حبك ليه هتحاول تعمل اى حاجة علشان مايمشيش من عندك مزاجه وحش ولو ماقدرتش تجيبها كفاية أنك خليته يحس أنك كنت عاوز ترضيه من غير ما تلومه انه لما دور على حاجة بيحبها ! فكر فيك علشان تحققهاله حتى لو كنت مش بتحبها !
مفيش مشاعر بتعوض مشاعر علشان اللى بنحس بيه مش اى حاجة وخلاص !
بلاش نخلى اللى بيحبنا يفكر يستغنى عن اللى بيحبه مننا علشان بقى مش قادر يلاقيه ولا قادر يطلبه…
لان الوقت اللى بتقدر تستغنى فيه عن أى حاجة كنت بتستناها من حد بتحبه ….
هتعرف أنك ما كنتش بتحبه !
أنت كنت متعود على الحاجات دى بس منه…
لانه ببساطة… لو كان بيحبك ماكناش هيخليك تستنى!
أحساس الفقد أوقات بيكون مفاجئ ومش متوقع أنه يحصل علشان كده مش بنملك القوة أننا نواصل تحمله !
بلاش تزايد على قدرة غيرك على التحمل وتعتبره فشل فى صبره وتضغط عليه ! فى الوقت اللى كان شايل شيلته لوحده وأنت أخترت تتفرج عليه !
“يقولون اننا لا نعرف قيمة ما نملك الا بعد ان نفقده،
ولكن الحقيقة …
اننا نعرف قيمة ما نملك ولكن لم نفكر ابدا اننا سنفقده !”
