حياتي اليوم صحيفة إلكترونية يومية
—
لأنني من عشاق مدن القناه وخاصة مدينتي الاسماعيلية الجميلة، وبورسعيد الساحرة، حيث ألتقي بأقاربي وأعز أصدقائي، ولما تمثله زيارتي في ( الويك إند ) من آن لآخر من راحة نفسيه كبري، لكل مافي المدينتين من نظافه، واماكن فسح تفتح النفس، وبهجة الإستمتاع بطعم السمك الطازه اللي يرم العضم .
لذلك كانت فرحتي غامرة بافتتاح محور 30 يونيو الذي يختصر الوقت الي ساعة وربع، بدلا من ثلاث ساعات ، ويوفر من المسافه حوالي 80 كيلو متر .
وبصراحه الفرحة كانت مش سايعاني وانا أشاهد السيد الرئيس يفتتح الطريق وأنفاق 3 يوليو . واخدني الحماس… وبدأت أجهز الشنط للإنطلاق الي بور سعيد عن طريق محور 30 يونيو ، وفضلت اتابع أفلام في التليفزيون عن المحور، و طوله وعرضه ، وعدد العمال اللي أنشأوه .. وصور متقطعه من مراحل ماقبل الإنشاء وما بعده .. وصور من طيارات ومن الأقمار الصناعيه.
لأن للأسف من صنع هذا الطريق الرائع… نسي أن يحسن الإعلان عنه ! لذلك.. مافيش كلمة واحده تدلك.. هو الطريق ده أوله فين بالضبط وآخره فين !! ولا حتى خريطه توضيحيه واحده في جريده ولا علي النت تبين لسكان القاهره طريق المحور فين ويروحوله منين !!
وطبعا سألت معارفي وأصدقائي .. لقيت حالهم من حالي، نفس الحيرة وكله بيضرب أخماس في اسداس، واللي يقولي ده مطلعه من طريق السويس واللي يقولي من طريق الاسماعيليه ، وناس تقول من الدائري ( وناس تقول وناس تفتي ) وفي النهايه تملكتني الحيرة والخوف من التوهان ولغيت الرحله ، لحد ما ناس غيري تدوخ السبع دوخات ويعرفوا محور 30 يونيو فين .. وبيروحوله منين .
ويا ساده يا كرام… يا هيئة الطرق والكباري احنا اللي يهمنا نعرف نستخدم الطريق منين وهنمشي عليه ازاي ؟ مش كام عامل بناه !
الطريق اتعمل علشان نستخدمه مش علشان ندور عليه مانلاقيهوش .. فياريت اللي عمل جميل يتمه، وبلاش تبوظوا الطبخه الحلوة علشان شوية ملح .
ويا مدينة بورسعيد الجميله ( انتظريني انا مش جايالك ) .. إلا لما اعرف أجيلك من القاهره في ساعه وربع ، عن طريق الكنز المفقود محور 30 يونيو .
