حياتي اليوم صحيفة إلكترونية يومية
—
أتاري اللي افتكرته زمان لقلبي حبيب
قدِر يبعد بعيد عني كمان ويغيب
ميعرفش إنه مهما يغيب لازم هيكون لينا نصيب
بأمر الله أكيد مكتوب في علم الغيب
هنتلاقى
**
وأتاريني أنا عاشقة بدوب في هواه ومنسيتش
ولو يوم قلت له كارهة.. محبيتش
هكون كدابة في كلامي ومش حاسة ومدريتش
وأكون مش عاوزة غير بس أنا وهو منبعدش
ونتلاقى
**
وأتاري الدنيا خوَّانة.. جراح في القلب بالكومة
وأتاريني في حبي كمان متهانة ومظلومة
دي أصلًا دنيا دوارة.. وكل حاجة مكتوبة
وأنا في حياتي محتارة.. وشابة بقلب كركوبة
لكن حاسة.. هنتلاقى
**
وأتاري المستحيل يمكن هيتحقق في غمضة عين
ونرجع يوم نكون ممكن لبعضينا وبعد سنين
وبعد ما تُهنا في دروبها وروحنا لفين
هتيجي صدفة تراضينا وتجمعنا.. ترجعنا ما دام عايشين
مسير الحي.. يتلاقى
