—
مش عايزة تانى تريقة
ولا عايزة اهلل فالملا
ولا اقول عشقتك.. كلما حضرت عينيك
بنساني وابقى بين ايدك
زى الورق
تطويها وقت مايحلى ليك
احساس فظيع
كل اما اقولك كلى ليك
تقفل عينيك
طب ليه كده
انا امتى قلت
انا عايزة كلمة حنينة
تقولها لما اصعب عليك
وقلبي ليه بيهون عليك
وعشت فاكرة اني ليك
والغدر فيك.. زي الزمن
اتاريه مصاحبك من زمن
بتبعنى ليه من غير تمن
تقبض حياتى مقدما
وانا قلبي كان جنبك
فقلبك يحضنك
وقلبك انت
زي ابن وعاق لامه
شلت همه ..حاجيت عليك
لكن القساوة طبع فيك
اوتار حنيني اتهلهلت
من نحيتك
عارف كمان.. حبك لغم
يحرقنى كل ما بلمسك
ولا فيك نغم
ولا صوت لثومة يهزني
ما العاشقين دابو وماتابو
وانا كنت دايبة وبعشقك
لكنى فوقت
مع كل ذكرى تشدني
اقولى ليه مستحملة
عارف اساس المشكلة
جواك صنم
احساس صنم
احساسي بيك بردوا انعدم
والمعضلة
انك رجعت تقول بحبك
فاكرني تانى هصدقك..
ماانا كنت بتمناها منك
وكنت تهرب منها
وجي بتسأل بعدها
مابقتش ليه بنحسها
طب قولها تانى
و شوف عيونى وقتها
مابقتش تلمع
مثلما… كان من زمان
ولا صوتى باسمك تسمعه
تناهيد بتقسم سكتي
مابقتش احس بالامان
بركان..
مشاعر واطفت
وخطاوي بينا ليه اختفت
مابقتش تدمع نظرتى
من فرحتى ساعة لوقاك
افهم بقى
علقم غرامك ضمني
بايدك انت قتلتنى
طب قولي ليه. حطمتني
وجي تقول بتحبنى
مش قادرة تانى اصدقك
بستسمحك….
افهم بقا .. فات الآون