الأحد , 20 يناير 2019
الرئيسية / خواطري / الشاعرة إيمان معاذ تكتب: آنا كارنينا..!

الشاعرة إيمان معاذ تكتب: آنا كارنينا..!

= 595

آنا كارنينا الحزينة
لما دابت فى الغرام ..
فات عليها درس هام
درس ما يتقال كلام
و التمن … كان عمرها
بس ملايين مننا ..
اتعلموا من بعدها ..
درس الحياة
*
آنا .. حاولى تسمعينى
عندى ليكى كلام كتير
بس أرجو تعذرينى ..
لو كلامى كان تقيل

لما ظلمة .. وحدتك
و وحشتك .. لعيون صغيرك ..
شدتك .. للمستحيل
كان اختيارك .. الرحيل
ظلمة القبر الصغير ..
كانت عليكى أرحم كتير
من ظلمة القبر .. الكبير

و أنتحرتى .. مش بالومك ..
باعذرك
الحبيب و الزوج .. أزوكى
عذبوكى ..
مزعوكى قبل ما يعدى الترام ..
على جثتك

و وقفت أراقب نظرتك ..
لعيون أميرك
كانت النظرة الأخيرة
طولت ..
و علمت فى قلب قلبى ..
دروس كتير
لما لحظة أتحولت ..
من نظرة دايبه فى الغرام
لاتهام .. و انتقام
و انقطع حبل الكلام

م العذاب الحب طار
زى الغبار
و بقيتى عار .. حتى عليه

عرفتى ليه ..
أنا مش بالومك أو باعاتبك
لأن فيه فى الدنيا زيك
مليون شهيدة .. للغرام
بيحبوا من دون العقول
علشان كده بارجع و أقول
لازم أقول

آنا كارنينا الحزينة
لما دابت فى الغرام
فات عليها درس هام
درس ما يتقال كلام
و التمن .. كان عمرها
بس ملآيين مننا ..
اتعلموا من بعدها ..
درس الحياة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: